Çempionlar Liqasında 2-ci təsnifat mərhələsinin cavab oyunlarından sonra klubların və futbolçuların statistik göstəriciləri açıqlanıb.

"Football-plus.az" xəbər verir ki, Azərbaycan təmsilçisi “Qarabağ” təsnifat mərhələlərində ən çox qol vuran komandalardandı. “Atlılar” 10 qolla 3-cü sırada yer alıb. Bu göstəricidə lider Norveçin “Budyo-Qlimt” klubudu – 12 qol.

Qurban Qurbanovun rəhbərlik etdiyi kollektiv ən çox hücuma çıxan komandalar arasında 5-cidi. Mübarizəyə 1-ci raunddan başlayan Azərbaycan çempionu 4 matçda ümumilikdə 52 hücum cəhdi edib. Bu göstəricinin lideri Bolqarıstan “Lüdoqorets”idi – 59 cəhd.

“Qarabağ” künc zərbələrinin sayında liderdi. “Atlılar” geridəqalan matçlarda 30 dəfə kornerdən istifadə edib. Azərbaycan klubu turnirdə ən çox qayda pozan komandalar arasında da birincidi. 63 dəfə kobud oynayan futbolçular bunların 15-də sarı vərəqə ilə cəzalanıb. “Qarabağ” eyni zamanda ən çox faula məruz qalanlardandı. Qurbanovun yetirmələrinin 58 dəfə qarşısı kobudluqla alınıb. Komanda bu göstəricidə 3-cüdü.

“Qarabağ”ın qapıçısı Şahruddin Məhəmmədəliyev ən çox seyv edənlər arasındadı. 6 dəfə qapısını qoldan xilas edən qolkiper bu göstəricidə 4-cüdü.

"Qarabağ" 2-ci mərhələdə "Sürix"i iki oyunun nəticəsinə görə, mübarizədən kənarlaşdırdı. "Atlılar"ın növbəti raunddakı rəqibi Macarıstan "Ferentsvaroş"u olacaq.