Avqustun 9-18-i aralığında Türkiyədə İslam Həmrəyliyi Oyunları keçiriləcək. Turnirə U-23 millimiz də qatılacaq. Bilindiyi kimi, komandaya Samir Əliyev rəhbərlik edəcək. Amma gənc mütəxəssis yarış ərəfəsində ciddi problemlə üzləşib. Daha dəqiq desək, heyəti formalaşdırmaqda çətinlik çəkir.
İyulun 21-də “Dalğa Arena”nın ehtiyat meydanında “Kəpəz”lə “Şamaxı” yoxlama oyununda üz-üzə gəldi ki, qarşılaşmanı izləyənlər arasında Samir bəy də var idi. Fürsətdən yararlanıb onunla qarşıdakı turnirdlə bağlı danışdıq: “U-23 millimizlə bağlı problemlərimiz çoxdu. İstədiyim futbolçuları sərəncamımda görə bilmirəm. Hazırda bütün komandalarla danışıqlar davam edir. Cavid Hüseynov və Yaşar Vahabzadə ilə danışmışam. "Şamaxı" - "Kəpəz" matçından sonra hər iki mütəxəssislə yenidən söhbətimiz baş tutdu. Sağ olsunlar, futbolçularını U-23-ə göndərəcəklərini bildirdilər. Qalan komandalarla da danışıqlarımız davam edir. Hazırda çox çətin vəziyyətdəyik. İslamiadanın startına az vaxt qalıb. 4 klubumuz avrokuboklarda çıxış etdiyindən bizə lazım olan futbolçuları verməkdə tərəddüd edirlər. Digərləri ölkə xaricində heyəti komplektləşdirirlər. Yəni istədiyim futbolçuları bir araya gətirib təlim-məşq toplanışına start verə bilmirəm. Vaxt isə daralır. İmkan daxilində Bakıda hazırlaşan komandaların yoxlama matçlarını maksimum canlı izləməyə çalışıram. Ümid edirəm ki, iyulun sonuna kimi istədiyim futbolçuları sərəncamımda görəcəm".
Mütəxəssis yaşı 23-dən yuxarı olan 3 futbolçunu da heyətə cəlb edəcəyini söylədi: "Bildiyiniz kimi, yaşı 23-dən yuxarı olan cəmi 3 futbolçu sifariş edə bilərik. Bu futbolçular maksimum təcrübəli, səviyyəli olmalıdı ki, oyunların axarına təsir edə bilsinlər. Konkret ad çəkməyəcəm, amma gözaltı etdiyim futbolçular var. Heyəti açıqlayanda biləcəksiz”.
Bir neçə gün öncə Samir Əliyevin U-21 millimizin baş məşqçi postuna təyinatı rəsmiləşdi. Mütəxəssisin bu komanda ilə bağlı fikirlərini də öyrəndik: "U-21 millimiz yenidən formalaşdırılacaq. Heyətə 2003 və yuxarı təvəllüdlü futbolçular cəlb olunacaq. Desək ki, qrupdan çıxacağıq, bu utopiya olar. Amma döyüşkən, mübariz kollektiv formalaşdırıb adımıza uyğun oyun sərgiləyəcəyik. Gənclər yığmamızla ilklərə imza atmaq istəyirəm".
ABDULLA İSMAYILOĞLU