“Borussiya”da yeni mövsümə hazırlıq prosesində şok vəziyyəti yaranıb. Dortmund klubunun yeni oyunçusu Sebastyen Halledə xərçəng xəstəliyi aşkar edilib.

Sebastyen sıraya nə vaxt dönəcək?

O, son məşqlərdən birindən sonra özünü pis hiss etməyə başlayıb. Müayinələr nəticəsində 28 yaşlı hücumçunun xayasında şiş aşkarlanıb. Klub iyulun 19-da ictimaiyyəti futbolçunun və onun ailəsinin şəxsi həyatına hörmət etməyə, həmçinin heç bir araşdırma aparmamağa çağırıb. Rəhbərlik Hallenin səhhəti ilə bağlı yeni məlumat olacağı halda dərhal açıqlayacağına da söz verib. “Borussiya”nın idman direktoru Sebastyan Kel bu haqda belə açıqlama verib: “Bu xəbər həm Sebastyen, həm də hamı üçün şok oldu. Onun mümkün qədər tezliklə sıraya dönəcəyinə ümid edirik. Futbolçumuzun ən yüksək səviyyədə müalicə olunması üçün əlimizdən gələni edəcəyik”.
Komandanın İsveçrədəki təlim-məşq toplanışını tərk edib Dortmunda qayıdan Halle artıq əməliyyat olunub. O, sosial şəbəkə hesabına bu haqda belə yazıb: “Hamıya salam. Sizə ilk addımın arxada qaldığını xəbər vermək istəyirəm! Mənimlə birgə olan “Borussiya” rəhbərliyinə və klubun tibb işçilərinə təşəkkür etmək istərdim. Mənə qayğısına görə əməliyyat olunduğum xəstəxananın bütün personalına da minnətdarlığımı bildirirəm”.
Hələ ki, Sebastyenin sıraya nə vaxt dönəcəyi haqda məlumat verilmir. Son xəbərlərə görə, “Borussiya” artıq onun yerinə oyunçu axtarışına başlayıb. İtaliyanın “TuttoMercato” portalı Andrea Belotti tezliklə Dortmundda peyda ola bilər. “Torino”nu azad agent kimi tərk edən hücumçunun Almaniya klubu ilə problemsiz anlaşmaq şansı var.
Belə aqibətlə hansı futbolçular üzləşiblər?
“Ayaks”dan 35 milyon avroya alınan Hallenin düşdüyü vəziyyət unikal deyil. Belə ki, Almaniyada son iki ayda daha iki oyunçuda xaya xərçəngi aşkar edilib. Onlar “Union”un müdafiəçisi Timo Baumqartl və “Herta”nın hücumçusu Marko Rixterdi. Hər iki oyunçu şişi götürmə əməliyyatına məruz qalıb. Sevindiricidi ki, onların bərpa prosesi normal keçir və yaşıl meydana mümkün qədər tez qayıtmağa hazırlaşırlar. Dünya futbolunda bu kimi nümunələri də xatırladaq.
* 2013-cü ilin yayında “Sassuolo”ya yenicə qoşulan Françesko Açerbinin xayasında xoşxassəli şiş aşkar edildi. Bu, erkən müəyyən edildiyindən futbolçu əməliyyat olunandan sonra yaşıl meydana qayıtdı. Amma həmin ilin dekabrında xəstəlik yenidən büruzə verdi: bu dəfə müayinələr şişin bədxassəli olduğunu ortaya çıxarmışdı. 5 dəfə kimya-terapiya kursu keçən Françesko 10 aydan sonra yenidən top qovmağa başladı. O vaxtdan xəstəlik bir daha geri qayıtmayıb.
* “Atletik”in müdafiəçisi Yeray Alvares də belə aqibət yaşayıb. Ona xaya xərçəngi diaqnozu ilk dəfə 2016-cı ilin dekabrında qoyuldu. Artıq 46 gündən sonra “Barselona”ya qarşı oyunda əvvəldən axıra qədər meydanda oldu. Lakin 2017-ci ilin yayında aparılan müayinələr həmin orqanda bədxassəli şişi ortaya çıxardı. Alvares də kimya-terapiya kursu keçməli oldu. “Atletik”in oyundaşları ona dəstək əlaməti olaraq başlarını daz qırxdırmışdılar. Yaxşı ki, müalicə bəhrəsini verdi və Yeray yenidən top qovmağa başladı.
* Aryen Robben isə bu xəstəliyə 2004-cü ildə tutulub. Niderland yığmasının və “Çelsi”nin sabiq yarımmüdafiəçisi həyatının həmin dövrünü belə xatırlayır: “Çox qorxmuşdum. Mənim üçün çətin dövr idi. Futbol ikinci plana keçmişdi. Bir neçə gün ərzində böyük həyəcan içində müayinənin nəticəsini gözlədim. Başıma nələrin gələcəyini bilmirdim. Xoşbəxtlikdən, şiş xoşxassəli idi. Müəyyən fasilədən sonra məşqlərə başladım...”