2021/22 mövsümü başa çatandan sonra bəzi futbolçular komandalarından ayrıldı. Bunlardan ikisi “Neftçi”nin şərəfini qoruyan Fəhmin Muradbəyli və Mirabdulla Abbasovdu. Onlar yeni baş məşqçi Laurentsiu Regekampfın gəlişindən sonra paytaxt təmsilçisini tərk etmək məcburiyyətində qaldılar. Adı çəkilənlərlə bir müddət öncə əlaqə saxlasaq da, hələ ki karyeraları ilə bağlı yenilik olmadığını söyləmişdilər. hazırda klubsuz qalan digər futbolçu isə vaxtilə millimizdə də forma geyən Amit Quluzadədi. Son olaraq Avstriyanın həvəskar “Ştadl Paura” komandasında çıxış edən yarımmüdafiəçi müqaviləsinin müddəti başa çatandan sonra klub axtarışında idi. O daha öncəki açıqlamalarında yenidən ölkə xaricində çıxış edəcəyini demişdi. Bütün bunları nəzərə alaraq adı çəkilən futbolçularla əlaqə saxlayıb, karyeralarındakı yeniliklərlə bağlı məlumat aldıq.
Fəhmin Muradbəyli: “Menecerim hazırda xarici klublarla danışıq prosesindədi. Mənim də fikrim belədi ki, özümü ölkə xaricində sınayım. İsrail, Yunanıstan, Türkiyə və başqar bir neçə ölkənin klublarından maraqlananlar var. İnşallah, bir problem olmasa, bundan sonra legioner həyatı yaşayacam. Ümid edirəm ki, bir həftəyə hansı kluba keçəcəyim dəqiqləşəcək”.
Mirabdulla Abbasov: “Hələ ki karyeramla bağlı yenilik yoxdu”.
Amit Quluzadə: "Avstriya klubundan rəsmi təklifim var idi. Komanda mənə “2+1” illik müqavilə də təklif etmişdi. Lakin müəyyən problemlərə görə bu komandaya keçidim baş tutmadı. Hazırda isə təklif yoxdu".
ŞAİR ABDULLA