“Sabah”ın əvəzedici komandasının yeni mövsümdə birinci divizionda çıxış etməyəcəyi rəsmən təsdiqləndi.

İK-nın üzvləri “tələbələr”in rəhbərliyinin istəyinə müsbət yanaşdı. Ancaq bu məsələdə diqqəti çəkən bir məqam var. Belə ki, İK-nın ötən il mayın 31-də keçirilən toplantısında əvəzedicilərlə bağlı qərar qəbul olunmuşdu:

Cəmi bir il əvvəl əvəzediciləri divizionda iştirak etməyən kluba cərimə kəsildiyi halda, bu il nədənsə bu addım atılmadı.

Və nəhayət, sonuncu, dünənki toplantıda ən çox maraq doğuran qərar barədə. “Sabah”ın ikinci komandasının divizionda iştirakdan imtinasından sonra AFFA rəhbərliyi iştirakçı sayı cüt olsun deyə, onu əvəzləyəcək komanda axtarışına çıxıb. AFFA-nın baş katibliyinə və PFL-ə meyarlar müəyyənləşdirmək, ona cavab verən və ilk müraciət edən Region Liqası komandasının aşağı dəstədə iştirakını təmin etmək tapşırıldı. Birinci divizionda çempionatın avqustun 24-də start götürəcəyini nəzərə alsaq, qısa müddətdə bu tələbləri yerinə yetirəcək həvəskar komandanı tapmaq müşkül məsələdi. Təbii ki, AFFA rəsmiləri də bunu yaxşı başa düşür. Ola bilsin, İK-nın iclasından xeyli əvvəl pərdəarxası söhbətlərdə bu məsələ ilə bağlı hansısa addımlar atılıb. Geridə qalan mövsümdə liqanın gümüş mükafatçısı olan “Xan Lənkəran” rəsmisinin gənclər və idman naziri Fərid Qayıbovla görüşü, mətbuata açıqlamasında üstüörtülü də olsa, müsbət sonluğa inandığını bildirməsi çox mətləbdən xəbər verir. Böyük ehtimalla 2022/23 “futbol ili”ndə aşağı dəstədə cənub bölgəsinin də təmsilçisini görə biləcəyik.

RƏŞAD