İAM rusların bütün şikayətlərini rədd etdi
İdman Arbitraj Məhkəməsi (İAM) Rusiya Futbol İttifaqının (RFİ) FİFA və UEFA-nın məlum sanksiyaları əleyhinə vediyi şikayətlərə cavab verib.
Football-plus.az xəbər verir ki, qərargahı İsveçrənin Lozanna şəhərində yerlləşən məhkəmə şimal qonşularımızı növbəti dəfə məyus edib.
“Zenit”, “Soçi”, ÇSKA və “Dinamo”nun da sanksiyalarla bağlı şikayəti təmin edilməyib. Rusiya futboluna qarşı sanksiyalar bu ölkənin Ukraynada hərbi əməliyyatlar aparması səbəbindən tətbiq olunub.
Xatırladaq ki, FİFA və UEFA fevralın 28-də Rusiyanın bütün milli və klub komandalarının beynəlxalq turnirlərdə iştirakına qadağa qoyub. İAM RFİ-nin beynəlxalq turnirlərdən kənarlaşdırma ilə bağlı qərarlardan verdiyi şikayətləri rədd edib. Başqa sözlə, sanksiyalar qüvvədə saxlanılıb və Rusiya futbolu növbəti bir ildə beynəlxalq yarışlarda təmsil olunmayacaq. Beləliklə, bu ölkənin komandaları avrokubokların 2022/23 mövsümündə, Millətlər Liqasında, U-21-lərin Avropa çempionatında, hazırda təşkil edilən qadınlar arasında Avropa çempionatında, həmçinin qadınlar arasında 2023-cü ildə təşkil ediləcək dünya çempionatının seçmə turnirində iştirak etməyəcəklər.
RFİ-nin İAM-ın qərarları ilə bağlı yaydığı bəyanatda belə bildirilir:
“RFİ İAM-nın qərarları ilə qətiyyən razılaşmır və maraqlarının müdafiəsi üçün cəhdlərini davam etdirəcək. İndi İAM-ın qərarlarla bağlı tam mətni gözləyirik. Onun təhlilindən sonra atacağımız növbəti addımlarla bağlı qərar veriləcək. Mümkün variantlar sırasına İsveçrənin Ali Məhkəməsinə, həmçinin RFİ-nin FİFA və UEFA-nın məlum sanksiyaları səbəbindən üzləşdiyi itkilərin əvəzinin verilməsi üçün İAM-a müraciətlər daxildi”.
Digər xəbərlər
