Türkiyənin Konya şəhərində keçiriləcək 5-ci İslam Həmrəyliyi Oyunlarına Azərbaycan yığma komandası kifayət qədər böyük heyətlə qatılacaq.

Football-plus.az xəbər verir ki, bu barədə Milli Olimpiya Komitəsinin (MOK) vitse-prezidenti Çingiz Hüseynzadə açıqlama verib.

MOK rəsmisi qarşıdakı Oyunlar üçün hədəflərini də açıqlayıb:

"Bakıda keçirilmiş əvvəlki Oyunlarda Azərbaycan komanda hesabında birinci yeri tutmuşdu. 2021-ci ildə keçirilməli olan İslamiada bu ilin avqustuna təxirə salınıb. Yenə də qələbə uğrunda mübarizə aparacağıq. Lakin məlumdu ki, 4-cü İslam Həmrəyliyi Oyunlarının yalnız sonuncu günündə biz əsas rəqibimiz Türkiyəni keçə bildik. Hazırkı yarışda da bu komandalar arasında mübarizə gərgin olacaq. Ümidvaram ki, Oyunlar maraqlı alınacaq və Azərbaycan idmançıları kifayət qədər uğur qazanacaq. Mən ölkəmizin ilk "3-lüy"ə daxil olacağını gözləyirəm. Düzdü, proqramda idmançılarımız üçün uğurlu sayılmayan növlər də mövcuddu. Lakin ümidvaram ki, ilk "3-lüy"ə daxil olmaq imkanlarımız var".

Qeyd edək ki, 5-ci İslam Həmrəyliyi Oyunları 9 - 18 avqustda keçiriləcək.