Basketbol üzrə Avroliqada çıxış edən klublardan ikisi sanki sözləşibmiş kimi eyni vaxtda baş məşqçi ilə müqavilə müddətini uzatmağa qərar verib. “Alba” rəsmi saytında baş məşqçi İsrael Qonsaleslə müqavilənin müddətinin uzadıldığını elan edib. Yeni müqavilə 2025-ci ilə qədər əməkdaşlığı nəzərdə tutur. 47 yaşlı ispan 2021/22 mövsümünün əvvəlində komandanın “sükanı arxasına” keçib, ona qədər isə baş məşqçi Aito Qarsiya Renesesin yardımçısı olub. “Alba” Qonsalesin rəhbərliyi altında son mövsümdə həm Almaniya çempionu olub, həm də ölkə kubokunu qazanıb. “Alba” həmçinin Avroliqada 10-cu yeri tutub ki, bu da klub tarixində ən yaxşı nəticədi.
ASVEL də Ti Cey Parkerlə müqavilə müddətini uzadıb. Yeni müqavilənin vaxtı 2026-cı ilə qədərdi. 38 yaşlı mütəxəssis klub prezidenti Toni Parkerin kiçik qardaşıdı. O, 2020-dən bəri komandanı çalışdırır. ASVEL Avroliqanın son mövsümündə 28 oyunun yalnız 8-də qələbə qazanmaqla sondan əvvəlki yeri tutsa da, Fransa çempionatında ardıcıl 2-ci dəfə qalib olub.