“Turan Tovuz”la “Kəpəz”in Gürcüstana səfəri planlaşdırılırdı.
Uzun fasilədən sonra elitaya qayıdan komandalar yeni mövsüm üçün hazırlığa başlayıb. Lakin məlum maliyyə problemləri səbəbindən hələ ki ölkə xaricinə yollana bilməyiblər. Onu da qeyd edək ki, büdcəyə qənaət məqsədiylə səfər quru yolu ilə planlaşdırılırdı. Amma məlum qadağalara görə səfər hava yolu ilə gerçəkləşməlidi. “Football-plus.az” saytı olaraq, detallarla maraqlnmaq üçün adı çəkilən komandaların mətbuat katibləri ilə əlaqə saxladıq.
Azad Mustafayev (“Kəpəz”in mətbuat katibi): “Hələ yeni məlumat yoxdu. Ümid edirik ki, növbəti həftənin 3-4-cü günlərində detallar dəqiq açıqlanacaq”.
Süleyman Tağıyev (“Turan Tovuz”un mətbuat katibi): “Heç bir yenilik yoxdu. Hələ ki gözləyirik. Ayın 15-nə yoldaşlıq oyunu planlaşdırırıq. Böyük ehtimalla oyundan sonra gedib-getməyəcəyimiz dəqiqləşəcək. Əslində Gürcüstana getmək istəyirik. Amma həm maddi duruma, həm də quru sərhədlər bağlı olduğuna görə konkret bir söz deyə bilmirik”.
Qeyd edək ki, Gürcüstana səfər planlaşdıranlardan “Səbail” artıq detalları açıqlayıb. "Dənizçilər” iyulun 12-də hava yolu ilə vətəni tərk edəcək. 10 günlük təlim-məşq toplanışı çərçivəsində üç yoxlama oyunu da təşkil olunacaq.
ŞAİR ABDULLA