Növbəti mövsümdən premyer-liqada 10 komanda mübarizə aparacaq.

Amma 8 klubun rəsmi saytı olduğu halda, "Turan Tovuz"la "Kəpəz"in internet ünvanı yoxdu. Hər iki komanda sosial şəbəkələrdəki səhifələrində paylaşımlar etməklə kifayətlənir. Bununla bağlı hər iki klubun mətbuat katibinin fikirlərini öyrəndik.

Azad Mustafayev (Kəpəz): "Qarşıya qoyulan məqsədlərdən biri də saytımızın yaradılmasıdı. Hazırda şirkətlərlə danışıqlar gedir. Ən geci ölkə çempionatının startına bir həftə qalmış saytımız fəaliyyətə başlayacaq".

Süleyman Tağıyev (Turan Tovuz): "Premyer-liqaya hazırlıqla yanaşı, saytımızın yaradılması yönündə də çalışmalar aparırıq. Yeni mövsüm başlayana kimi saytımızı istifadəçilərin sərəncamına verəcəyik. Həmçinin bütün sosial şəbəkələrdə səhifələrimiz mövcuddu. Orda daim paylaşımlar edirik, bundan sonra da fəallığımız davam edəcək".

ABDULLA İSMAYILOĞLU