Yuri Albertonun “Zenit” macərası çox da çəkməyib: o, Braziliyaya qayıdıb.

Rusiya klubuna bu ilin əvvəlində “İnternasyonal”dan transfer olunan braziliyalı hücumçu “Korintians”a icarəyə verilib. 21 yaşlı futbolçu San Paulu klubunda bu status ilə bir il ərzində çıxış edəcək. Yuri Albertonun Rusiya premyer-liqasında keçirdiyi 11 oyunda 4 qolun və 2 məhsuldar ötürmənin müəllifi olduğunu qeyd edək.

Onun vətəninə qayıdışı “Korintians”ın iki oyunçusunun “Zenit”ə keçməsi ilə mümkün olub. Braziliya klubu qapıçı İvan Kuarezma ilə yarımmüdafiəçi Qustavo Mantuanı sankt-peterburqlulara icarəyə verib. Şimallıların bu futbolçuları bir ildən sonra daimi əsasda sıralarında saxlamaq hüququ var.

Yeri gəlmişkən, Rusiyanın son çempionun digər transfer əməliyyatlarını da nəzərinizə çatdıraq. “Zenit” Mateo Kassyeranı “Soçi”dən alıb. Kolumbiyalı hücumçu yeni klubu ilə “3+1 il” sxemi üzrə müqavilə bağlayıb. Onun keçidi sankt-peterburqlulara 4 milyon avroya başa gəlib. Rusiya klubları arasındakı anlaşmada Mateoya görə bonuslar da nəzərdə tutulub. 25 yaşlı futbolçu premyer-liqanın son mövsümündə 22 oyuna vurduğu 14 qolla bombardirlərin yekun siyahısında yalnız “Ufa”nın forvardı Həmid Ağalarovdan (19) geri qalıb.

Maraqlıdı ki, “Zenit”in heyətinə qatacağı digər oyunçu da son mövsümü “Soçi”də keçirib. Artıq müdafiəçi Rodriqaonun keçidi ilə bağlı razılıq əldə olunub. Sankt-Peterburq klubunun baş direktoru Aleksandr Medvedev braziliyalı futbolçunun da “3+1 il” sxemi üzrə müqavilə imzalayacağını bildirib. 26 yaşlı Rodriqao son mövsüm bütün turnirlərdə meydana çıxdığı 31 oyunda 3 qol vurub.