Tural Əsgərov: “Klublarda özbaşınalıq, qanunsuz fəaliyyət baş alıb gedir”
Beynəlxalq Futbolçuların Həmkarlar İttifaqı olan FİFPro maraqlı bir məqalə dərc edib.
Yazıda futbolçulara Türkiyə, Çin, Yunanıstan, Rumıniya, Əlcəzair, Səudiyyə Ərəbistanı kimi ölkələrin çempionatlarında oynamaq tövsiyə olunmur. Belə ki, adı çəkilən ölkələrin klubları futbolçu ilə müqaviləyə sadiq qalmayaraq, əksər hallarda ya sözləşmədə qeyd olunan maaşdan aşağı pul ödəyir, ya səbəbsiz yerə uzun müddət maaşları gecikdirir, ya da heç bir əsas olmadan futbolçularla müqaviləyə birtərəfli xitam verir. Bu ölkələrlə bağlı FİFPro-ya çox sayda şikayətlər daxil olub. Xatırladaq ki, azərbaycanlı futbolçular da yuxarıda qeyd olunan özbaşınalıqlarla üzləşib. Məsələn, Türkiyənin 1-ci liqasında çıxış edən Vüsal İsgəndərlini, Yunanıstanın 1-ci liqasında oynayan Tural Bayramlı və Turan Manafovu qeyd etmək olar. Hətta sonuncu 3 aylıq maaşının verilməməsiylə bağlı FİFA-ya şikayət də edib. "Football-plus.az" saytı olaraq bu məsələ ilə bağlı futbol menecerinin fikrini öyrəndik. Tural Əsgərovu dinləyək: “FİFPro son dərəcə rəsmi, ciddi qurumdu. Ora futbolçulardan şikayətlər daxil olmasa, heç vaxt durub açıqlama verməz ki, Rumıniya, Türkiyə, Yunanıstan və başqa ölkələrin çempionatında çıxış edən klublarda özbaşınalıq, qanunsuz fəaliyyət baş alıb gedir. Həqiqətən də adı çəkilən ölkələrin klublarında belə xoşagəlməz hallar yaşanır. Futbolçuları aldatma, maaşlarını gecikdirmə və ya ödəməmək, onları istismar etmək və sair belə hallar çoxdu. Amma bunun baş verməsinin səbəblərindən biri də futbolçuların bilgisizliyi, peşəkar menecerlərlə işbirliyinin olmamasıdı. Məsələn, futbolçuya 100 min avroluq təklif gəlir, o da pula aldanaraq müqaviləyə qol çəkir. Sonra da sözləşmədə göstərilən məbləğdən daha az maaş verir, gecikdirir və ya ödəmirlər. Əksər hallarda 2-3 ay maaş ödənilmir, sonra futbolçunu sakitləşdirmək üçün az məbləğdə pul verilir. Daha sonra, ümumiyyətlə, ödəniş edilmir. Belə olan halda futbolçu ya şikayət etmək, ya da klubdan ayrılmaq məcburiyyətində qalır. Şikayət prosesi uzun çəkdiyindən əksər futbolçular komandadan ayrılmağı üstün tutur. Belə olan halda isə klub rəhbərliyi şərt qoyur ki, azad agent statusu əldə etmək üçün sənədə qol çək ki, sənə heç bir borcumuz yoxdu. Futbolçular da qalır pis vəziyyətdə. Düşünürəm ki, aidiyyatı futbol qurumları adı çəkilən ölkələrlə bağlı gec-tez ciddi tədbirlər görəcək. Amma gərək futbolçular da ehtiyatlı olsunlar, ən əsası maariflənsinlər".
ABDULLA İSMAYILOĞLU
Digər xəbərlər
