Səbuhi Səfiyarlı: “Federasiya ciddi tədbir görür, artıq bir neçə təklif də irəli sürülüb”
Beynəlxalq Futbolçuların Həmkarlar İttifaqı olan FİFPro maraqlı bir məqalə dərc edib.
Yazıda futbolçulara Türkiyə, Çin, Yunanıstan, Rumıniya, Əlcəzair, Səudiyyə Ərəbistanı kimi ölkələrin çempionatlarında oynamaq tövsiyə olunmur. Belə ki, adı çəkilən ölkələrin klubları futbolçu ilə müqaviləyə sadiq qalmayaraq, əksər hallarda ya sözləşmədə qeyd olunan maaşdan aşağı pul ödəyir, ya səbəbsiz yerə uzun müddət maaşları gecikdirir, ya da heç bir əsas olmadan futbolçularla müqaviləyə birtərəfli xitam verir. Bu ölkələrlə bağlı FİFPro-ya çox sayda şikayətlər daxil olub. Xatırladaq ki, azərbaycanlı futbolçular da yuxarıda qeyd olunan özbaşınalıqlarla üzləşib. Məsələn, Türkiyənin 1-ci liqasında çıxış edən Vüsal İsgəndərlini, Yunanıstanın 1-ci liqasında oynayan Tural Bayramlı və Turan Manafovu qeyd etmək olar. Hətta sonuncu 3 aylıq maaşının verilməməsiylə bağlı FİFA-ya şikayət də edib. "Football-plus.az" saytı olaraq bu məsələ ilə bağlı futbol menecerinin fikrini öyrəndik. Səbuhi Səfiyarlı bunları söylədi: “FİFPro-nun qeyd etdiyi qanunsuzluqları mən də təcrübəmdə görmüşəm. Əsas da Yunanıstan və Türkiyə klublarından. Yunanıstan premyer-liqasında çempionluq uğrunda mübarizə aparan 5-6 köklü klubda xoşagəlməz hallar olmur. Bu əsasən orta və daha aşağı pillələrdə yer alan komandalarla yanaşı, 1-ci liqa təmsilçilərində baş verir. Məsələn, vaxtilə çempionatımızda çıxış edən, sonra Yunanıstana yollanan İbrahima Niassenin FİFA-ya şikayətini qeyd edə bilərəm. Həmçinin vaxtilə Mahir Şükürov "Karşıyaka"da çıxış edərkən yığılan maaşını ala bilmədiyinə görə FİFA-ya şikayət etmişdi. Türkiyədə bu qanunsuzluqla bağlı yerli federasiya ciddi tədbir görür, artıq bir neçə təklif də irəli sürülüb. Məsələn, klub hansısa futbolçunu transfer edirsə, müqavilə şərtlərində qeyd olunan maddi məsələlərlə bağlı öhdəlikləri sponsor daşısın. Hazırda Türkiyə Futbol Federasiyası futbolçuların FİFA-ya şikayətlərini azaltmaq üçün qanunsuzluqları aradan qaldırmağa çalışır. Türkiyə ilə Yunanıstanda futbolçuların maaşını ala bilməməsinin səbəblərindən biri də odu ki, həm futbolda maliyyə sabitliyi yoxdu, həm də klub prezidentləri tez-tez istefa verir. Çinə gəlincə, orda 50-100 min avro və ya dollar dəyərindəki futbolçuların transferi və maaşlarında o qərər ciddi problemlər olmur. Amma milyonlarla dəyəri olanları transfer etdikdə, həmin futbolçular özünü yaxşı tərəfdən göstərərək əlavə bonuslar istədikdə və ya əksinə, zəif çıxışla diqqəti çəkəndə, Çin klubları cığallıq edir”.
ABDULLA İSMAYILOĞLU
Digər xəbərlər
