Fanatların sevimlisi olan nigeriyalı vinger Entoni Nvakaemeni əldən buraxan ''Trabzonspor''un onun boşluğunu Trezeqe ilə doldurmağa yaxın olduğunu xəbər vermişdik.

"Football-plus.az" xəbər verir ki, bu transfer srağagün rəsmən açıqlandı. Qaradənizlilər tam adı Mahmud Ahmed İbrahim Hassan olan 27 yaşlı misirli vingerlə dördillik müqavilə imzalayıb. ''Aston Villa'' ilə uzun müddət aparılan danışıqlardan sonra tərəflər 4 milyon avroya anlaşma əldə ediblər. ''Trabzonspor'' qarşı tərəfə bu məbləği 4 il ərzində 4 hissəyə bölərək ödəyəcək. Trezeqe başqa kluba satılacağı və ya icarəyə veriləcəyi halda əldə olunan məbləğin 10 faizi də birmingemlilərə çatacaq. Bundan başqa, trabzonlular futbolçunun menecerinə ümumi məbləğin 5 faizi həcmində (200 min avro) pul ödəyəcəklər. Təcrübəli futbolçunun yeni klubunda illik məvacibi 1 milyon 550 min avroya bərabər olacaq. Xatırladaq ki, 2019-da 10 milyon avroya ''Kasımpaşa''dan ''Aston Villa''ya keçən Trezeqe ötən mövsümün ikinci dövrəsini ''İstanbul BŞ''də keçirmiş və 13 superliqa matçında 6 qol, 4 məhsuldar ötürmə ilə yadda qalmışdı. Misir yığmasında isə o, 55 oyuna 8 qol vurub. Trezeqe 2018-dən bəri prezident vəzifəsini icra edən Ahmet Ağaoğlunun dönəmində transfer edilən 39-cu, 55 illik klub tarixinin isə 163-cü əcnəbi oyunçusu oldu. Trezeqeyə qədər ''Trabzonspor''da cəmi 2 misirli futbolçu top qovmuşdu. Söhbət Ayman Əbdeləzizlə (2007/08) Səyed Moavaddan (2008) gedir.

Onu da bildirək ki, superliqanın son çempionu dünən toplanış üçün Sloveniyaya yollandı. Abdulla Avcının komandası Kran şəhərində ayın 17-nə qədər toplanış keçəcək. Trezeqenin qarşıdakı günlərdə komandanın düşərgəsinə qoşulacağı gözlənilir. Maraqlıdı ki, fərqli səbəblər üzündən 13 futbolçu toplanışdan kənar qalıb! Qapıçı Erce Kardeşler ilə ötən mövsümün 2-ci dövrəsini icarə əsasında ''Kayserispor''da keçirən Abdülkadir Parmakın komandadan ayrılacağı dəqiqdi. Bu oyunçular Avcının planlarına daxil deyil. Gənc oyunçular Enis Destan ilə Batuhan Kör təcrübə toplamaq üçün başqa klublara icarəyə veriləcək.

Bundan başqa, Trondsen, İsmayıl Köybaşı, Flavio, Yunus Mallı, Diabate, Koyta və Salih Kavrazlı da böyük ehtimalla yeni mövsümdə komandada olmayacaqlar. Yalnız Bruno Peres ilə Jervinyo zədə üzündən toplanışdan kənar qalıb.

ƏLİ