Yay transfer dövrünün ən səs-küylü keçidlərini hələ ki, “Sabah” həyata keçirib.

Qəsəbə təmsilçisi premyer-liqanın bombardirlərindən Davit Volkovu, millimizin üzvləri Anatoli Nuriyevlə, Namik Ələskərovu heyətinə qatıb. Dünən “bayquşlar”ın braziliyalı forvard Vaqner Lavı transfer etmək istədiyini xəbər vermişdik. Görünən odu ki, Bakı klubu gələn mövsüm üçün ideal heyət qurmağı planlaşdırır. Bu səbəbdən də Murad Musayev şəxsən özü transferlərə nəzarət edir. Rusiyalı mütəxəssis Vaqnerin transferinin həll olunmasını istəyir. Bundan əlavə, gənc mütəxəssis hücum mövqeyinə daha bir oyunçunun alınmasından edilməsindən yanadı. Çünki Murad Musayev Davit Volkovu sağ cinah vingeri oynatmaq niyyətindədi. Ümumiyyətlə, gənc mütəxəssis gələn mövsüm 4-3-3 sxemindən istifadə etmək niyyətindədi. Belə olan təqdirdə, məşqçi əlində olan bütün futbolçulardan rahat istifadə edə biləcək. Bu səbəbdən də Musayev rəhbərlikdən daha 2 legionerin alınmasını istəyib.

Bunlardan biri yuxarıda qeyd etdiyimiz kimi hücumçu, digəri isə qapıçı olacaq. Məşqçi iyulun 17-nə kimi bu keçidlərin baş tutmasından yanadı. Çünki komanda bu tarixdə Bolqarıstana təlim-məşq toplanışına yollanacaq. Gənc mütəxəssis Banskodakı yoxlama matçlarında yekun heyəti sınayıb, premyer-liqanın yeni mövsümü üçün komandanı formalaşdırmaq niyyətindədi.

İLKİN SULTANLI