Çeferin: ''Ən güclü namizəd Türkiyədi''
UEFA prezidenti Aleksander Çeferin son açıqlamasında diqqətçəkən ifadələr işlədib.
Türkiyənin AÇ-2032-yə evsahibliyi üçün şansının yüksək olduğunu deyən futbol adamı yaxşı münasibətdə olmadığı ''Real'' haqda danışıb, eləcə Xosep Qvardiola ilə Yürgen Kloppu tənqid edib: ''İtaliyada stadionlarla bağlı sıxıntı var. Federasiya prezidenti Qabriele Qravina ilə də bunu müzakirə etmişəm. Onların daha çox stadiona ehtiyacı var. Məncə, AÇ-2032 üçün ən güclü namizəd Türkiyədi. Superliqa məsələsini Anyelli ilə müzakirə etməmişəm. Florentino Peres ilə isə bir dəfə görüşüm olub. UEFA mənim şəxsi mülküm deyil. Sadəcə ÇL-i qazandıqları üçün Peresi təbrik etdim, vəssalam. Biz heç kimi heç nəyə məcbur etmirik. Klublar UEFA bayrağı altındakı turnirlərdə iştirak edib-etməyəcəklərinə özləri qərar verməlidi. Eyni zamanda öz turnirlərini də yarada bilərlər. Amma bu durumda qətiyyən bizim turnirlərimizə buraxılmayacaqlar. Superliqa layihəsi artıq ölüb. Zatən ora heç kim qatılmaq da istəmir. Yalnız hamıya əsəbləşən və hamını məhkəməyə verən 3 nəfər görürəm. Bu mövzu artıq bağlanıb. Qvardiola ilə Kloppun sıx təqvim üzündən tez-tez UEFA və FİFA-nı tənqid etməsinin şahidi oluram. Bu tənqidi səsləndirmək asandı. Amma daha az oyun daha az pul deməkdi. Məncə, şikayəti onlar yox, aylıq 1000 avro məvacib alan fabrika işçiləri etməlidi''.
