9 ildən sonra premyer-liqaya dönən “Turan Tovuz” əsas heyətlə təlim-məşq toplanışına başlamasa da, baş məşqçi Ayxan Abbasov Bakıda bir həftə boyunca seleksiya xarakterli məşqlər keçməklə yadda qaldı.

“Neftçi”nin Bakıxanov qəsəbəsindəki “Türk Hava Yolları” adlanan bazasında təşkil olunan məşqlərə kimlərin qatıldığını, birhəftəlik seleksiyanın kluba nə verdiyini öyrənmək üçün “boz qurdlar”ın Müşahidə Şurasının sədri Oqtay Abdullayevlə söhbətləşdik.

- Komanda rəsmi təlim-məşq toplanışına başlamasa da, baş məşqçi Bakıda birhəftəlik seleksiya xarakterli məşqlər keçdi. Onun bu addımı nəyə hesablanmışdı və komandaya nə faydası oldu?
- Bəli, komanda hələ toplanışa start verməyib. İndi “Turan Tovuz”un formalaşması mərhələsindəyik. Bildiyiniz kimi, artıq bəzi təcrübəli oyunçularla danışıq aparıb razılıq əldə etmişik. Onlar iyunun 27-də Tovuzda start götürəcək təlim-məşq toplanışına qatılacaqlar. Bakıda keçirilən seleksiya xarakterli həftəlik tsikl isə əsasən gəncləri görmək baxımından əhəmiyyətli idi. Bu mərhələ ötən mövsüm birinci divizionda “Turan Tovuz”un heyətində çıxış edən və həmçinin başqa klublarda olan istedadlı gənclərə yenidən baxmaq, onların premyer-liqada komandaya lazım olub-olmadığını gözdən keçirmək üçün nəzərdə tutulmuşdu. Baş məşqçi iyunun 27-də başlayacaq toplanışa hazır komanda ilə başlamaq istəyir. Fikrimizcə, həmin arada gənclərə vaxt ayırmaq, onlarla ayrıca işləmək bir qədər vaxt tələb edəcəkdi ki, bu olmasın deyə belə addım atmaq məqsədəuyğun sayıldı.

- Axtardığınızı tapa bildiz?
- Bu haqda Ayxan müəllimlə danışsaz, daha yaxşı olar. Aralarında mənim bəyəndiklərim oldu. Ancaq son söz baş məşçqçiyə məxsusdu. O kimi məsləhət bilsə, heyətə cəlb edəcəyik. Səviyyəsi hələ ki elitada oynamağa imkan verməyən tovuzlu yeniyetmə və gənclər əvəzedici komandada çıxış edəcək. Onlarla yolları birdəfəlik ayrımaq fikrimiz yoxdu. Ola bilsin, bir qədər də ikinci komandada çıxış etdikdən sonra əsas komandaya xeyir verə biləcək səviyyəyə çatacaqlar.

- Bu gün bütün klubları narahat edən bir məsələ var ki, o da büdcənin təsdiq olunmamasıdı. Bu yöndə “Turan Tovuz”da vəziyyət necədi?
- O biri klublarda necə, bizdə də elə. Hamı kimi biz də büdcənin təsdiq olunmasını gözləyirik. Ancaq bu o demək deyil ki, əlimizi yanımıza salıb oturmuşuq. Özünüz də qeyd etdiz ki, artıq Bakıda seleksiya xarakterli olsa da, bir həftə məşq keçirilib. İyunun 27-də komanda Tovuzda bir araya gələcək. Söylənilənlərə görə, premyer-liqanın hər bir klubuna dövlət səviyyəsində 3 milyon manat ayrılacaq. Onun 2 milyonu əsas komandaya, 1 milyonu isə uşaq futbolunun inkişafına. Ancaq bu hələ təsdiqini tapmayıb. Buna baxmayaraq, işləyirik. Çalışırıq ki, Tovuzun futbol ənənələrinə uyğun komanda yaradaq, çempionatda yaxşı çıxış edək. Bu işdə rayonun icra başçısına, iş adamlarına da güvənirik. İcra başçısı Məmməd Məmmədov geridə qalan mövsümün son oyununda stadiona təşrif buyurmuşdu. Onunla görüşümüz zamanı “Turan Tovuz”a dəstək olacağını, komandanın problemlərini həll edəcəyini bildirmişdi. Həmin vaxt heç komandanın premyer-liqada çıxış edəcəyi rəsmən açıqlanmamışdı. İnanıram ki, Məmməd müəllim “Turan Tovuz”un uğur qazanması, Tovuzu premyer-liqada layiqincə təmsil etməsi üçün əlindən gələni edəcək. Özü də bizimlə söhbətdə ümumi vəziyyətlə maraqlandı, nəyin çatıb-çatmadığını soruşdu. Bəli, onu da başa düşürəm ki, İcra Hakimiyyəti təkbaşına premyer-liqada komanda saxlamaq iqtidarında deyil. Rayonun futboldan başqa da işləri var. Ancaq Məmməd müəllim bizimlə söhbətdə çox inamlı danışdı ki, bu da bizə əlavə motivasiya verdi.

- Hazırda klubda ab-hava necədi?
- 9 ildən sonra premyer-liqaya qayıldan klubda ab-hava necə olar? Təbii ki, hamı səbirsizliklə yeni mövsümün açılışını gözləyir. Baş məşqçimiz Ayxan Abbasov “Zirə” və “Sumqayıt”da çalışdığı dönəmdə nəyə qadir olduğunu göstərib. Gənc olmasına baxmayaraq, sözünü demiş mütəxəssislərdən sayılır. Klubun icraçı direktoru Nadir Nəbiyev və mən çalışırıq ki, rəqabətədavamlı “Turan Tovuz” formalışdıraq. Nadir müəllim də bu yöndə çox işlər görüb və indi də görməkdədi. İnanıram ki, nəticələri ilə tovuzlu azarkeşləri sevindirəcək komanda yarada biləcəyik.

RƏŞAD