Son günlər ölkə futbolunda bir-birindən maraqlı hadisələrə şahidlik edirik.

“Neftçi”nin uzun axtarışından sonra yeni baş məşqçisinə qovuşması, “köhnə qvardiya”nın “Kəpəz”ə dönüşü, “Şamaxı”nın “sükan”ının Cavid Hüseynova tapşırılması, bölgə təmsilçisinə Kamran İsmayılovun idman direktoru təyin olunması geridə qoyduğumuz həftəyə damğa vuran olaylardı. “Şamaxı”dan söz düşmüşkən, bölgə təmsilçisinin baş məşqçisi qeyri-rəsmi bilinsə də, rəhbərlik hələ də Hüseynovun təyinatını ictimaiyyətə açıqlamayıb. Əslində heç kluba kimin rəhbərlik etdiyi də geniş kütləyə məlum deyil. “Futbol+” olaraq, bu yöndə müəyyən araşdırma apardıq, “Şamaxı”nın kimin kurasiyasında olduğunu üzə çıxarmağa çalışdıq.

İcra Hakimiyyətində toplantı

“Şamaxı”da Zaur Axundov erası başa çatandan sonra yuxarı dairələrin yeni sponsor axtarışı uzun sürmədi. Əslində Axundovla vidalaşmamış başbilənlər artıq “Şamaxı”nın yeni himayədarını müəyyənləşdirmişdilər. Ölkənin futbol təsərrüfatını idarə edənlər müəyyən müzakirələrdən sonra klubu Şamaxının İcra Hakimiyyətinə tapşırmağı lazım bildilər. Onsuz da yaxın günlərdə premyer-liqanın bütün klublarına dövlət səviyyəsində hansısa formada maliyyə ayrılacaq. Yerli icra orqanı da həmin vəsaitin üstünə müəyyən qədər əlavə etməklə bölgənin eyniadlı klubunun tək sahibi olmaq şansı qazanıb. “Şirlər”in yeni himayədarı məlum olandan sonra İcra Hakimiyyətində klubun strukturu, idarəetməsi ilə bağlı toplantı keçirilib. Mənbəmizin sözlərinə görə, sözügedən iclasda rayonun icra başçısı ilə yanaşı, polis rəsisi, prokuroru və başqa dövlər orqanlarının nümayəndələri iştirak edib. Onu da qeyd edək ki, bizə çatan informasiyaya görə, Şamaxının icra başçısı Tahir Məmmədov kimi, rayonun prokuroru Müşfiq Səfərov, polis rəisi Əliyəddin Səfərov də futbol azarkeşidi. Toplantıda çıxış edən Müşfiq bəyin təklifi ilə komandaya rəhbərlik Elçin Usuba tapşırılıb. Rayon prokuroru Elçin bəyi yaxından tanıdığını, futbol sahəsində müəyyən təcrübəsinin olduğunu bildirib. Onun təklifi toplantı iştirakçıları tərəfindən xoş qarşılanıb və bundan sonra Elçin bəyin qarşısında “yaşıl işıq yanıb”.

Kimdi Elçin Usub?

Mənbəmizin sözlərinə görə, hüquq sahəsində çalışan Elçin bəy Vəkillər Kollegiyasının üzvü olmaqla yanaşı, futzal üzrə ölkə çempionatının ikinci liqasında çıxış edən “Advokat”ın rəhbəridi. Onu da öyrəndik ki, Usub illər öncə AFFA-nın Lisenziyalaşdırma Komissiyasında fəaliyyət göstərib. O, hüquq meyarı üzrə tələblərin yerinə yetirilməsinə nəzarət edib. “Advokat”dakı uğurlu fəaliyyət, AFFA-da iş təcrübəsinin olması sonda Elçin bəyi böyük futbola gətirib.

Kamran İsmayılov müəmması...

Srağagün mediada Kamran İsmayılovun, demək olar, yenidən qurulan “Şamaxı”ya idman direktoru təyin olunması haqda yayılan xəbərlər aydın səmada şimşək effekti verdi. Düzdü, Kamran bəy futbola heç də yad sima sayıla bilməz. O, uzun illər AFFA-da və fərqli klublarda funksioner kimi çalışıb. Tərcümeyi-halında “Şəmkir”, “Bakı”, “Simurq” klublarının adları var ki, hər biri öz dönəmində ölkə futbolunda iddialılardan sayılıb. Tanıyanlar Kamran bəyi bacarıqlı, işini bilən kadr kimi xarakterizə edirlər. Ancaq xeyli müddət idi ki, İsmayılov futbol təsərrüfatından uzaq düşmüşdü. Və bu səbəbdən onun uzun aradan sonra elita təmsilçisinə idman direktoru kimi təyinat alması çoxlarının təəccübünə səbəb oldu. Bu yerdə ortaya hamını maraqlandıran sual çıxır. Necə oldu ki, Kamran bəy uzun illərdən sonra futbola döndü və “Şamaxı”da heç də aşağı vəzifə sayılmayan idman direktoru postuna təyinat aldı? Adının çəkilməsini istəməyən mənbəmiz sözügedən təyinatla bağlı bunlar söylədi: