“Neftçi” Nyonda kiprlilərlə işçi qrup yaradıb
Ölkəmizi Çempionlar Liqası və Konfrans Liqasında təmsil edəcək klublarımızın rəqiblərinin adına aydınlıq gəldi.
Nyonda təşkil olunan püşkatma mərasimində 4 klubumuz da təmsil olundu. Bunu nəzərə alıb, onların səfər təəssüratını öyrəndik.
Fərid Ağayev ("Qarabağ"ın Beynəlxalq əlaqələr üzrə meneceri): “Komandamız tezliklə Avstriyada təlim-məşq toplanışına yollanacağından, heyətin 95 faizinin Şengen vizası var. Bu vaxta kimi Polşa komandaları ilə avrokuboklarda yolumuz kəsişdiyindən, həmin ölkədə kifayət qədər tanış şirkətlər var. Odu ki, oteldə yerləşmə, nəqliyyat və bu kimi məsələlərdə problem olmayacaq. Yeganə natahatlığımız Polşada yaşayan soydaşlarımızla bağlıdı. Onlardan matçda iştirak edib-etməyəcəkləri ilə bağlı sorğu almamışıq. Bunu da həll etsək, Varşavada nə qədər azarkeş dəstəyimiz olacağını biləcəyik".
Elman Himayətoğlu ("Zirə"nin baş meneceri): "Demək olar ki, avrokuboklarda iştirak edən bütün komandaların nümayəndələri Nyonda, UEFA-nın mənzil-qərargahında olur. Püşkatmada iştirakın əsas məqsədi nəticələr bəlli olandan sonra rəqib komandanın nümayəndəsi ilə görüşməkdi. Püşkatma bitən kimi hər kəs qarşı tərəfin nümayəndəsini axtarır. “Makkabi”nin nümayəndəsi İdan Alterlə görüşdüm. Təşkilatı məsələlərlə bağlı ilkin detalları müzakirə etdik. Görüşümüz çox yaxşı keçdi. Qarşı tərəf viza dəstəyi və başqa məsələlərdə kömək edəcəyini söylədi. Eyni zamanda, biz tərəfdən də onlara bu və başqa məsələlərdə kömək olunacaq".
Nail Kərimov ("Qəbələ"nin baş meneceri): "Püşkatmadan sonra rəqibimiz "Fehervar"ın nümayəndələriylə görüşümüz oldu. Macarıstan təmsilçisiylə əksər məsələlərdə razılığa gəldik. Bir-iki xırda detal qalıb ki, onları da bu ay ərzində həll edəcəyik".
Qədir Həsənov ("Neftçi"nin baş meneceri): "Rəqib komandanın nümayəndələriylə çox xoş tanışlığımız gerçəkləşdi. Kipr təmsilçisi ilk dəfə avrokuboklarda çıxış edəcəyindən onlarla təcrübəmizi bölüşdük. Təşkilati, uçuş, viza məsələləriylə bağlı işçi qruplar yaradılıb. Açıq qalan heç bir nüans qalmayıb".
ABDULLA İSMAYILOĞLU
Digər xəbərlər
