“Guya Qoncarenko ilə Vernidub gəlib "Qarabağ" səviyyəsində komanda yaradacaq?”
"Neftçi"nin Müşahidə Şurasının iclasında Samir Abasovla yolların ayrılması və vakant posta əcnəbi məşqçi axtarılması haqda qərarın qəbulu son günlərin aktual mövzularındandı.
Klub rəhbərliyi hazırda Viktor Qonçarenko və Yuri Vernidub ilə danışıqlar aparır.
Məsələnin ciddiliyini nəzərə alaraq vaxtilə "Neftçi"nin formasını geyən veteran futbolçulara tribuna verdik. Onlardan biri də Samir Əliyevdi. O, həm Samir Abasovun göndərilməsinə, həm də komandanın əcnəbi mütəxəssisə tapşırılacağına münasibət bildirdi:"Özümüzün yetərincə təcrübəli mütəxəssisimiz olduğu halda, Müşahidə Şurası hansı məntiqlə əcnəbilərin ayağı altına xalça salır, anlamıram. 8 illik həsrətdən sonra komandanı çempion, yola saldığımız mövsümdə isə vitse-çempion edən Samir Abasovun işinə xitam vermək hansı ədalətə sığır? İndi əcnəbi məşqçi gətirməklə böyük uğur qazanacaqlarını düşünürlər. Baxın, Azərbaycan futbolunda ən böyük uğur qazanan Roman Qriqorçuk idi. Avroliqadakı nəticəni bir kənaraq qoyaq. "Qəbələ" rəhbərliyi illərlə ona milyonlar xərclədi, amma ölkə çempionatında 2-ci yeri tutmaqdan başqa uğur qazana bilmədi. Guya Qoncarenko ilə Vernidub gəlib "Qarabağ" səviyyəsində komanda yaradacaq? Bunlar hamısı öz məşqçilərimizi gözümçıxdıya salmaqdan və pisikdirməkdən başqa bir şey deyil. Bu gün ölkənin 1 nömrəli məşqçisi sayılan Qurban Qurbanov birdən-birə parlamadı. Ona etimad göstərdilər, zaman tanıdılar və nəticə göz önündədi. Əcnəbilərə hər cür şərait yaratmaq əvəzinə yerli mütəxəssislərə şans tanımaq, inanmaq lazımdı. Amma bu gedişlə, görünür, yerli məşqçilər hələ çox kölgədə qalacaq".
ABDULLA İSMAYILOĞLU
Digər xəbərlər
