Montella hansı türk oyunçunu Mourinyoya məsləhət görür?
Vinçentso Montellanın Türkiyədə keçirdiyi ilk mövsümü uğurlu saymaq olar.
O, “Adana Dəmirspor”un başına 3-cü turdan sonra keçdi. Superliqanın debütantı bir ara hətta 3-cü pilləyə qədər yüksəlsə də, sonlara yaxın bir qədər eniş yaşadığından mövsümü 9-cu pillədə tamamladı. Daha öncə ''Fiorentina'', ''Milan'', ''Sevilya''nı çalışdırmış 47 yaşlı mütəxəssis İtaliyanın ''Qazetto dello Sport'' nəşrinə müsahibə verib. O, Türkiyədə yaşadığı təcrübədən, Balotellinin yüksəlişindən, Andrea Pirlonun ''Fatih Karagümrük''ün başına keçmək üzrə olmasından və Yunus Akgündən danışıb. Qeyd edək ki, İtaliya mətbuatının iddiasına görə Zəki Çeliki ''Lill''dən transfer etməyə yaxın olan Joze Mourinyonun ''Roma''sı Yunusa görə də ''Qalatasaray''a 7,5 milyon avroluq təklif irəli sürüb. Son mövsümü məhz ''Adana Dəmirspor''da icarədə keçirən 21 yaşlı Yunus 39 rəsmi oyunda 9 qol, 17 məhsuldar ötürməlik performansla diqqəti çəkməyi bacarıb. Montellanı dinləyək: ''Bu mövsüm məşqçi kimi nəyə qadir olduğumu göstərmək üçün alışıb-yanırdım. Əvvəlki klublarımda həm bəxtsizliklər yaşamış, həm də bəzi səhvlərə yol vermişdim. Hər şeyə yenidən başlamaq istədim. Özü də bunu Türkiyədə məşqçisini qovmuş, aşağı sıralarda qərarlaşan debütant bir klubda həyata keçirməkdən çəkinmədim. Mənim gəlişimlə komandaya yeni ab-hava gəldi. Qısa müddətdə 4-cü pilləyə qədər yüksəldik. Bəzi taktiki yeniliklər gətirdim. Təxminən 5-6 ay yuxarı pillələrdə qərarlaşdıq. Sonradan bir qədər gerilədik ki, bu da normaldı. Zədələr üzündən bəzi matçlarda istədiyimiz heyətlə oynaya bilmədik. Amma mövsümü 7:0-lıq gözəl bir qələbə ilə tamamladıq. Məşqçi karyeramda bəlkə də ən çox razı qaldığım mövsümü geridə qoydum. Oyunçuların, komandanın yüksəlişini görmək məni sevindirdi. ''Adana Dəmirspor''la müqaviləm davam edir. Amma əsas odu ki, başqanla çox yaxşı münasibətlərdəyik. Güclü xarakteri var. Onunla münasibət qurmağı bacarmaq lazımdı. Bir-birimizi yaxşı anlayırıq. Türkiyədəki işimdən zövq alıram. Orda qonaqpərvər və yaxşı qəlbli insanlarla tanış oldum. Təbii ki, mənə fürsət yaradılsa, işimi davam etdirməyə hazıram. Birmənalı şəkildə deyə bilərəm ki, Türkiyədən İtaliyaya artıq daha güclü bir insan və daha güclü bir məşqçi kimi qayıdacam. Hətta qol vurandan sonra ehtiyat zonada təzahürat səsləndirməyi də öyrənmişəm. Əvvəllər heç vaxt bunu etmirdim. Balotellinin yüksəlişi də məni ayrıca sevindirir. O qarşısına yenidən yığma səviyyəsində bir oyunçuya çevrilmək hədəfi qoyub. Zatən oyunçu yetərli qədər çalışmasa, istəkli olmasa, hər şeyə pozitiv yanaşmasa, məşqçi heç nə edə bilməz. O bunu bacardı. Qalanı isə istedad məsələsidi. Çünki Balotelli həqiqətən də futbol oynamağı çox gözəl bacarır. Pirlonun Türkiyəyə gəlməsini istəyərəm. Superliqa səviyyəli turnirdi. Burda da bəzən xırda detallar həlledici rol oynayır. Biz - taktikaya üstünlük verən italiyalı məşqçilər də çempionatın güclənməsinə töhfə verə bilərik. Demirəm ki, bu məsələdə hamıdan üstünük. Amma taktiki cəhətdən buranın futboluna bəzi şeylər qata bilərik. Yunus Akgün ilə bağlı Mourinyo ilə aramızda bir söhbət olmayıb. Amma belə bir fürsətim olsa, birmənalı şəkildə onlara Yunusu almağı məsləhət görərəm. Güclü, sürətli və texnikalıdı. Qol vurmağı da, məhsuldar ötürmə verməyi də gözəl bacarır. Zərbə vurarkən həmişə topu künclərə göndərməyə çalışır. Üzərində işləyib bir qədər də inkişaf edə bilər. Təəssüf ki, bizdə yalnız icarə əsasında oynayırdı və onu ''Qalatasaray''a göndərmək məcburiyyətində qaldıq. Mənə qədər superliqada normal oyun təcrübəsi yox idi. Ona güvəndim və meydanda bunun qarşılığını aldım''.
Digər xəbərlər
