De Byazi köməkçilərindən niyə imtina edib?
Millimizin Millətlər Liqasının C divizionunun 3-cü qrupunda Qazaxıstana 0:2 hesabı ilə məğlub olduğu qarşılaşmadan əvvəl yerli internet portallarında bir xəbər yayıldı.
Yığmanın köməkçi məşqçiləri Benito Karbone və Kladuio Belluçi ilə yolların ayrıldığı tirajlandı. Hətta yığmaya yeni mütəxəssis də cəlb olunub. Bu şəxs isə Fabio Qallodu. Onun düşərgəyə Malta toplanışında qoşulduğu deyilir.
Canni de Byazinin köməkçilərindən hansı səbəbdən üz döndərdiyi məlum deyil. Bunu öyrənmək üçün AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla ilə əlaqə saxlamağı lazım bildik:
“Millinin iki məşqçisi eyni vaxtda getməyib. Belluçi daha əvvəl ayrılmışdı, Karbone təxminən 1 ay əvvəl. Hər ikisi şəxsi məsələlərlə bağlı fəaliyyətini davam etdirə bilməyəcəklərini dedilər. Hazırda çalışan Fabio Qallo da yeni gəlməyib, 3 aydan çoxdu çalışır. Əlavə olaraq kiminsə millidə işə başlayacağı nəzərdə tutulmur”.
Yeri gəlmişkən, Belluçi millimizdən sonra A seriyasında Valter Matsarinin köməkçisi kimi "Kalyari"də işə başlamışdı. Ancaq görünür, onun ayağı düşərli olmayıb. Sözügedən klub İtaliya çempionatını autsayder kimi başa vuraraq B seriyasına yuvarlanıb. Matsari isə istefaya göndərilib.
SƏNƏM FƏRHADOVA
Digər xəbərlər
