“Valensiya”nın prezidenti Anil Murtini vəzifəsindən azad olunub.

Buna onun, belə desək, ağzının danışığını bilməməsi səbəb olub.

Klubun rəhbəri futbolçulardan birinə hədə-qorxu gəlmişdi. Murti Karlos Soleri təhdid etdiyi qalmaqallı səs yazılarının yayılmasından sonra istefaya göndərilib. O, mövsümün sonunda komandanı azad agent kimi tərk edəcəyi halda yarımmüdafiəçini “mediada öldürəcəyini” bildirmişdi. Səs yazısında prezidentin klubun hazırkı maliyyə vəziyyəti haqda açıq danışması, eyni zamanda Valensiya şəhərinin rəhbərliyi barəsində pis fikirlər səsləndirməsi diqqəti cəlb etmişdi.

Bir neçə gün əvvəl “Valensiya” rəhbərliyi Murtini müdafiə edən bəyanat yayaraq “Superdeportes” nəşrinin “reallığı təhrif etməyə çalışdığını” vurğulamışdı. Ancaq İspaniya klubu sonradan mövqeyini dəyişib və Şon Bey “Valensiya”nın müvəqqəti prezidenti təyin edilib.