“Valensiya”nın prezidentinin səsyazısı aranı qarışdırdı
“Valensiya”nın 2021/22 mövsümündəki nəticələri idealdan çox uzaqdı.
La Liqada 11-ci yer və ölkə kubokunun finalında “Betis”ə məğlubiyyət, təbii ki, “yarasalar”ın azarkeşlərini razı sala bilməz. Arzuolunmaz nəticələrin üzərinə klubdaxili ziddiyyətləri də gəlmək lazımdı. Bu ziddiyyətlər “Valensiya”nı parçalayır. Fanatlar artıq çoxdan klubun sahibi Piter Limlə müharibə vəziyyətindədi: ötən ilin dekabrında 15 min adam ona etiraz etmişdi. İndi də klub ətrafında yeni qalmaqal yaranıb.
İspaniyanın “Superdeportes” nəşri klub prezidenti Anil Murtinin səsyazısını dərc edib. Prezident orda növbəti mövsüm aparıcı oyunçulardan Xose Qayya və Karlos Solerdən imtina edəcəyini deyir. Murti əvvəlcə Qayyanı tərifləyir, sonra isə bildirir ki, müdafiəçi “Valensiya” artıq onun ambisiyalarına uyğun gəlmədiyinə görə getməlidi:
“Kubokun finalındakı məğlubiyyətdən və avrokuboklara vəsiqə qazana bilməyəndən sonra Xose bir qədər məyusdu, ancaq komandanı mövsümün finişinə yaxşı aparır (Qayya “Valensiya”nın kapitanıdı – red.). O çoxdan bu komandadadı, sadiqliyi xoşuma gəlir. Qayyanın yığmada oynamaq və Çempionlar Liqasında çıxış edən komandaya qoşulmaq istəyinə hörmət etməlisiz. Ancaq mən ona növbəti mövsüm transfer bazarında fəal çalışmaq niyyətində olmadığımı desəm, cavab verəcək ki, onda mənim burda nə işim var”.
Prezident səsyazısında onu da əlav edir ki, gələn mövsüm Qayyanın mövqeyində klubun öz yetirməsi olan, 19 yaşlı Xesus Vaskes oynayacaq. Murti Karlos Soler haqda daha sərt danışır. Sözündən belə çıxır ki, yarımmüdafiəçini pulsuz əldən vermək niyyətində deyil – hətta mediada onun imicini zədələyəcəyi ilə bağlı təhdid edir:
“Karlos Soler açıq-aydın bildirir ki, komandanı tərk etmək istəyir və biz bu qərara hörmət etməliyik. Onun ailəsi var, qalmaqalsız getmək istəyir ki, ailəsi Valensiya küçələrində rahat gəzə bilsin. Ancaq Karlos yanvarda pulsuz (futbolçunun müqavilə müddəti 2023-ün iyununda bitəcək – red.) getsə, onu mətbuatda “öldürərəm”. Lazım olsa, bu işə 100 min avro qoymağa hazıram. Karlos bizə pul qazandırmalıdı, çünki akademiyamız onu yetişdirib”.
“Valensiya” isə “Superdeportes”in araşdırmasına operativ şəkildə reaksiya verib və saytında bəyanat yayıb:
“Bu səsyazısı Murtinin aprelin 27-də Valensiyadan olan biznesmenlər klub fondunun təmsilçiləri ilə görüşü zamanı qeydə alınıb. Ümumi danışıq kontekstində yalan ideya vermək və mübahisə yaratmaq üçün söhbətin məzmunu redaktə olunub və saxtalaşdırılıb. “Superdeportes” özəl sferaya aid olan və prezident Murtidən icazə alınmadan qeydə alınan səsyazısının konteksdən çıxarılmış məzmununu dərc etməklə peşə etikasını ciddi şəkildə pozub və özəl həyata müdaxilə edib. Bu hərəkət “Superdeportes” nəşrinin son aylarda “Valensiya”ya qarşı apardığı böhtan kampaniyasının bir hissəsidi. Kampaniya bir neçə ay əvvəl – klub adı çəkilən nəşrin reklam təklifini geri çevirəndən sonra başlayıb. “Valensiya”nın hüquq şöbəsi hazırda bu nəşrə münasibətdə cavab tədbirləri görməklə bağlı düşünür”.
Yaxşı, indi kimə inanasan?
ORXAN
Digər xəbərlər
