Bakıda atıcılıq üzrə keçirilən dünya kubokunda 10 metr məsafəyə tapançadan atəşaçma yarışında kişilər arasında qızıl medal qazanan Damir Mikeçin jurnalistlərə müsahibəsi...

- Dünya kubokunda qızıl medala sahib olmaq necə hissdi?
- 22 ildi ki, bu idman növü ilə məşğul oluram. Bu müddət ərzində həmişə medallar, uğurlar qazanmaq haqda düşünmüşəm. “Qızıl” sahibi olmaq, bunu arzu etmək gözəl hissdir. Bu, insanın psixologiyasına müsbət təsir edir. Bəzən fikirləşirsən ki, bunu bacararam, ya yox ? Mən bu düşüncələrlə həmişə yaşadım. Çox şükürlər olsun ki, qızıl medal əldə edə bildim. Bakı mənim üçün düşərli şəhər oldu. İndiyə kimi gördüyüm mərkəzlərin ən mükəmməli sizin ölkədə yerləşir. İlk dəfə Azərbaycan 2015-ci ildə keçirilən Avropa oyunları zamanı olmuşam. Həmin yarışlarda 2 qızıl medala sahib olmuşmdum. Bu məkan mənim üçün hər zaman ən gözəl xatirələrlə yadda qalır. Ən yaxşı anlarımı mənə xatırladır. Bu da imkan verir ki, burda medallar qazanım.

- Bu gün Serbiya turnirdə ikinci medalını qazandı. Lazarın Kovaçeviçin qələbəsi sizin üçün əlavə motivasiya oldu?
- O, bu gün “buzu qırdı”. Lazar gənc və çox yaxşı atıcıdı. Biz həmişə onun uğur əldə edəcəyini gözləyirdik. Bugünkü yarışda da ona dəstək olduq. Lazarın qızıl medal qazanması məni bir az da həvəsləndirdi. Bu, mənim də eyni nəticə əldə etməyimə təkan verdi. Beləliklə, bu gün Serbiya 2 qızıl medal əldə etdi. 2 gündü ki, yarışda iştirak edirik. Sabah da qızıl medal qazanmağa çalışacağıq.


- Kaloyan Stamenovla final görüşü sizin üçün çətin keçdi, yoxsa asan? Sanki bəzi hallarda təəssüflənirdiniz...
- Burdakı yarışın finalında fərqli sistemdən istifadə olundu. Qranadakı "Qran-Pri" yarışlarında da iştirak etmişdim. Həmin turnirdə gümüş medalın sahibi oldum. Orda finalda yaxın dostum, azərbaycanlı idman Ruslan Lunyov idi. Təəssüf ki, o, bugünkü yarışda uğur qazana bilmədi. Bolqarıstanlı idmançı ilə qarşılaşma da həddən artıq çətin idi. Ümumiyyətlə, yarışdakı bütün nəticələr yuxarı idi. 5,82-lik göstərici final üçün kifayət etmədi. Kalonyanla görüş çox izdihamlı keçdi. Tamaşaçılar dayanmadan bizi alqışladılar. Hətta diqqətim yayılmasın deyə qulaqcıqlardan istifadə etməli oldum. Nəticə qazanmaq üçün yox, işimə diqqətimi yönəltmişdim. Finala vəsiqə qazandığımı eşitdən zaman fikirləşdim ki, bu, mənim üçün kifayət deyil. Qızıl medalı arzulayırdım. Yenə deyirəm, Kalonyanla görüş çox çətin keçdi. O da gənc atletdi. Lakin onun təcrübəyə daha çox ehtiyacı var. Bolqarıstanlı idmançı düzgün yol seçib. İnanıram ki, gələcəkdə daha yaxşı nəticələr əldə edəcək. Qələbə qazanmağım, boynuma qızıl medalın asılması məni çox xoşbəxt edir.


- Dünya kubokunun yekununda Serbiya mükafatçılar sıralamasında ilk pillələrdə yer ala biləcək?
- Bakıdakı yarışa 8 nəfərdən ibarət komanda ilə gəlmişik. Onlardan 2-i pnevmatik tapança, 6-sı tüfəng yarışlarında iştirak edəcəklər. Komandamızda hər kəs yüksək səviyyəli atletlərdi. İnanıram ki, bu yarışda daha çox medal qazanacağıq. “Qızıl”a sahib olmasaq da, medalçılar siyahısına düşəcəyik. Bakıdakı dünya kubokunun finalına vəsiqə qazanmağın özü də böyük uğurdu. Burdakı yarışlara azarkeş marağı var. Dünyanın hər yerindən idmançılar turnirdə iştirak etmək üçün Azərbaycana gəliblər. Belə bir yarışda qızıl medal qazanmaq mənim üçün fəxrdi.