“Milan”ı 11 ildən sonra çempionluğa daşıyan Stefano Pyolinin başına iş gəldiyini xəbər vermişdik.

"Football-plus.az" xəbər verir ki, baş məşqçinin qızıl medalı oğurlanmışdı. O, bu haqda bazar günü keçirilən mükafatlandırma mərasimindən sonrakı mətbuat konfransında belə demişdi:

“Stadionda çempionluğu qeyd edərkən arzuolunmaz hadisə baş verib. Çempionluq medalım oğurlandı, kimsə onu boynumdan çıxardı. Onu mənə qaytarsalar, minnətdar olaram. Axı bu, mənim yeganə medalımdı...”

Qeyd edək ki, Pyoli həqiqətən də, məşqçilik karyerasında ilk titulunu qazanıb. A Seriyasının mətbuat xidməti məlum hadisəyə dərhal reaksiya vermişdi.

56 yaşlı məşqçiyə yeni medal veriləcəyi bildirilmişdi. Lakin buna ehtiyac olmayacaq. Ona görə ki, oğurlanmış medalı don Stefanoya qaytarılacaq. 20-25 yaş aralığında olan üç gənc oğlan medalı polisə təhvil verib. Doğrudu, onlar bu qəniməti oğurlamadıqlarını, onu yaşıl meydanın kənarında, paltardəyişmə otağına aparan tunelin qarşısında tapdıqlarını bildiriblər. Polis hər halda faktın araşdırılmasını zəruri hesab edib.