Basketbolda Avropanın bir nömrəli turniri sayılan Avroliqada Türkiyə təmsilçisi ''Anadolu Efes'' tarix yazmaqda davam edir.

2018/19-da turnirin finalında ÇSKA-ya məğlub olan, 2020/21-də finalda ''Barselona''nı məğlub edən ''Anadolu Efes'' bu il yenə zəfər əldə edərək ardıcıl 2-ci, tarixində 3-cü dəfə Avropanın kralına çevrildi. “AnadoluEfes” bu dəfə Serbiyanın paytaxtı Belqradda keçirilən ''dördlər finalı''nda əvvəlcə ''Olimpiakos''u yenərək finala yüksəldisə, həll edici görüşdə ''Real''ı 57:56 hesabı ilə məğlub etdi. ''AnadoluEfes'' 1958-dən buyana keçirilən turnirdə ardıcıl 2 il çempionluq sevinci yaşayan 10-cu kollektiv oldu. Daha öncə bu uğuru ''Riqa'', ''Real'', ''Vareze'', ''Kantu'', ''Sibona Zaqreb'', ''Milan'', ''Yuqoplastika'', ''Makkabi T-Ə'' və ''Olimpiakos'' yaşamışdı. Finalda 23 xal toplayan Türkiyə klubunun serbiyalı ulduzu Vasiliye Miçiç ''dördlər finalı''nın ən dəyərli oyunçusu seçildi. Bu uğuru ilə Avroliqanın sponsoru Türkiyə Hava Yolları şirkəti tərəfindən 1 milyon dollar mükafat qazanan Miçiç ötən mövsümdə'' dördlər finalı''nın ən dəyərli oyunçusu seçilmişdi. ''AnadoluEfes''in çalışdırıcısı Ərgin Ataman isə məşqçi karyerasında avrokuboklarda 5-ci titulunu qazandı. Təcrübəli mütəxəssis son iki mövsümdə ki tarixi uğurdan öncə 2002-də ''Siena'' ilə FİBA Saporta Kubokunu, 2012-də ''Beşiktaş''la FİBA Avroçellenc Kubokunu, 2016-da ''Qalatasaray''la ULEB Avropa Kubokunu qazanmışdı.