Kilian Mbappe müqaviləsini yeniləyəndən sonra PSJ rəhbərliyindən bu yay iki futbolçu almasını istəyib.

“Bild” qəzetinin yaydığı xəbərə görə, söhbət Fransa millisinin oyunçuları olan “Monako”nun yarımmüdafiəçisi Orelyen Tçuameni və “Barselona”nın vingeri Usman Dembeledən gedir. PSJ-nin baş direktorunun artıq Dembelenin agenti Mussa Sissoko ilə görüşdüyü və futbolçunun mümkün transferini müzakirə etdiyi də bildirilib.

Qeyd edək ki, bir neçə gün əvvəl Tçuameninin “Real”la müqavilə imzalamağa razılaşdığı haqda xəbər yayılmışdı. Lakin son xəbərlərdə İspaniya klubunun ona görə “knyazlar”ın tələb etdiyi 80 milyon avronu ödəməyə hazır olmadığı qeyd edilir. Fürsəti əldən verməyən PSJ isə dərhal “Monako” ilə təmas qurub. Maraqlıdı ki, danışıqlar prosesində Mbappe də iştirak edir.