Nəhayət, mayın 21-də Kilian Mbappenin gələcək karyerasına rəsmən aydınlıq gəlib.

Onun qərarı, heç şübhəsiz, “Real” rəhbərliyini və bu komandanın milyonlarla azarkeşini məyus edib.

PSJ-də 2018-ci ildən çıxış edən Mbappe bir neçə ay əvvəl “Real”la şifahi razılığa gəlmişdi. Onun bu yay azad agent kimi İspaniya klubuna keçməsi gözlənilirdi. Lakin 23 yaşlı hücumçu çox götür-qoydan sonra madridlilərin təklifini bir kənara qoyaraq hazırkı komandasında qalmağa qərar verib. Amma bu qərarı elə-belə verməyib. Gənc futbolçunu aylardı dilə tutmağa çalışan PSJ onu yeni müqaviləyə razı salmaq üçün vaxt və maliyyə planında çox zəhmətə qatlaşıb. Fransa klubunun rəsmi saytının yaydığı xəbərə görə, Kilian ilə iyunun 30-da qüvvədən düşəcək müqavilənin müddəti 2025-ci ilin yayına qədər uzadılıb. Rəsmi məlumatda yeni sözləşmənin maliyyə şərtlərinə aydınlıq gətirilməyib. Bu planda beynəlxalq KİV-də yayılan son rəqəmləri nəzərinizə çatdırırıq. Paytaxt klubunun DÇ-2018-in qalibinə imza pulu kimi 300 milyon avro ödəyəcəyi iddia edilirdi. Lakin yeni müqavilə rəsmiləşəndən sonra yayılan xəbərlərdə bu rəqəmin təxminən 150-200 milyon avro olduğu qeyd olunur. Kilianın illik məvacibinin isə əvvəlcə iddia edildiyi kimi 100 milyon deyil, 40 milyon avro olacağı bildirilir.

“Ekip” qəzetinin yazdığına görə, klub onu razı salması üçün rəhbərlikdə dəyişikliklər edəcəyinə və transfer əməliyyatlarında bu gənc oğlanın fikirlərini də dinləyəcəyinə söz verib. Bundan başqa, klub Mbappeni Fransa futbolu qarşısında vəzifələrinin olduğuna inandıra bilib. Bura onun doğulduğu Paris şəhərini təmsil edən klubla Çempionlar Liqasının qalibi olmaq və dünyada Liqa 1-in nüfuzunu artırmaq imkanı aid edilir. Futbolçunun PSJ-də qalacağı bəyan ediləndən sonra klub və onun ətrafında son vaxtlar hökm sürən atmosfer yaxşılaşıb. Belə ki, yerli azarkeşlərin kluba münasibəti dəyişib: onlar bir neçə ay sürən boykota son qoyub və komandanın 10-cu çempionluğunu məhz indi bayram ediblər.

Səbəbkar isə klubda qalmasını belə şərh edib:

Əl-Xelayfinin yeni müqavilənin reallaşdığını rəsmən açıqladığı məqamda yerli fanatlar “Puta Madrid” ifadəsini qışqırmağa başlayıblar. Prezident ilə futbolçunun bu təhqiramiz qışqırıqların sona çatmasını təbəssümlə gözləməsi diqqətdən yayınmayıb. Kilian çıxışında “Real”ın azarkeşlərindən üzr istəməyi lazım bilib:

“Onlara minnətdaram. 14 yaşımdakı halı nəzərə almasaq, heç vaxt Madrid komandasının formasını geyməmişəm. Amma bu komandanın tərəfdarları məni həmişə əziz oyunçusu kimi qəbul ediblər. Belə münasibətə görə təşəkkür etmək vacibdi. Onların məyusluğunu anlayıram. Azarkeşlərin mənim Fransada qalmaq istəməyimi anlayışla qarşılayacağına inanıram. Mən fransalıyam, buna görə klubumu, ölkə çempionatını və Fransa futbolunu yeni səviyyəyə qaldırmaq istəyirəm”.

Mbappenin müqaviləsini yeniləməsi ilə Leonardonun PSJ-dən getməsi bir olub. PSJ-nin idman direktoru Fransa çempionatının sonuncu turunun “Mets”lə oyunundan (5:0) bir neçə dəqiqə sonra vəzifəsindən azad edilib. Leonardo ilk dəfə bu postda 2011-14-cü illərdə çalışıb. Sonra “Milan” və “Antalyaspor” klublarında müxtəlif vəzifələrdə işləyib. Braziliyalı funksioner 2019-cu ildə yenidən PSJ-nin idman direktoru təyin edilib. Yerli mənbələr onun istefaya göndərilməsinin klubun qətərli sahiblərinin son illərdəki transfer əməliyyatlarından narazılığı ilə bağlı olduğunu qeyd edir. Artıq Leonardonun yerinə “Selta”nın strateji məsləhətçisi Luiş Kampuş təyinat alacağı məlum olub. Tezliklə Maurisio Poçettinonun da Parisi tərk etməsi gözlənilir. Baş məşqçi vəzifəsinə isə Zinəddin Zidan əsas namizəd sayılır. Qətərin əmiri Şeyx Təmim bin Həməd Əl-Taninin artıq onunla PSJ-yə mümkün təyinatıyla bağlı danışıq apardığı məlum olub.

Əlavə edək ki, İspaniya La Liqası PSJ-dən UEFA-ya şikayət edib. Bu qurumun rəhbərliyi Fransa klubunun yaxın bir neçə il ərzində 700 milyon avroluq itki ilə üzləşməsi fonunda Mbappe ilə müqaviləni fantastik şərtlərlə yeniləməsinin mövcud qaydalara uyğun olmadığını vurğulayır.

ORXAN