"Qarabağ" və "Zirə" Qəbələyə azarkeş aparır? - AÇIQLAMALAR
Mayın 27-də Qəbələ şəhər stadionunda keçiriləcək ölkə kubokunun final oyununda "Qarabağla "Zirə" qarşılaşacaq.
Həlledici görüşlə bağlı maraq doğuran məqamlardan biri də hər iki komandanın nə qədər azarkeşinin Qəbələyə yollanacağıdı. Bunu öyrənmək üçün öncə “Zirə”nin mətbuat katibi Elmar Abdullazadə ilə əlaqə saxladıq:
"Qəbələdə keçiriləcək kubok oyununa “Zirə”nin nə qədər azarkeşinin gedəcəyini bilmirik. Biz bütün azarkeşlərimizə Qəbələdə dəstək olmaları üçün müraciət etmişik və klubun onları avtobuslarla təmin edəcəyini də bildirmişik. Getmək istəyən azarkeşlərin sayına görə avtobuslar ayrılacaq".
"Qarabağ"ın mətbuat katibi Gündüz Abbaszadə isə məsələyə belə aydınlıq gətirdi:
"İmarət Tayfa" azarkeşlərinin nə qədərinin Qəbələyə gedəcəyini dəqiq deyə bilmərəm. Amma kubok matçının biletləri artıq əlimizdədi, getmək istəyənlər təmin olunacaq. Bizdə heç vaxt azarkeşlər üçün ayrıca avtobuslar tutulmayıb, özləri sərbəst şəkildə oyunlarımıza gəliblər".
"İmarət Tayfa" azarkeş qrupunun fəal üzvlərindən Elnur Quliyevin də fikrini öyrəndik:
"İmarət Tayfa" adından Qəbələdəki final matçına nə qədər azarkeşin gedəcəyini deyə bilmərəm. Amma özüm və ətrafımdakı 15-20 nəfərinin adından deyə bilərəm ki, həmişə komandamızının yanındayıq və məkandan asılı olmayaraq, təyinat yerinə özümüzü çatdıracağıq".
ABDULLA İSMAYILOĞLU
Digər xəbərlər
