“Qarabağ” beş gün Qəbələdə qalacaq - AÇIQLAMA
“Qarabağ”la “Qəbələ” bir həftə ərzində üç dəfə üz-üzə gələcək.
Komandalar sabah ölkə kubokunun yarımfinal mərhələsinin ilk oyununda qarşılaşacaq. Bazar günü isə premyer-liqanın 24-cü turu çərçivəsində münasibətləri aydınlaşdıracaqlar. Növbəti həftənin çərşənbə günü yarımfinalın cavab matçında Qurban Qurbanovla Elmar Baxşıyevin komandaları gücünü sınayacaq. Təbii ki, burda əsas çətinlik Ağdam təmsilçisi üçün olacaq. “Köhlən atlar” aprelin 20-si və 24-də “qırmızı-qaralar”ın qonağı olacaq.
Redaksiyamıza daxil olan məlumata görə, ağdamlılar bu səbəbdən 5 gün Qəbələdə qalacaq. İnformasiyanı dəqiqləşdirmək üçün klubun mətbuat xidmətinin rəhbəri Gündüz Abbaszadə ilə əlaqə saxladıq. Həmkarımız xəbəri təsdiqlədi: “Bəli, aprelin 19-dan 24-nə qədər Qəbələdə olacağıq. Yol yorğunluğunu nəzərə alıb, 5 gün ərzində Qəbələyə səfər etməmək üçün belə qərar verdik. “Qafqaz Sport” otelində qalacağıq. “Qəbələ”yə müraciət etmişik. Məşq üçün orda bizə şərait yaradacaqlar. Oyundan dərhal sonra da Bakıya dönəcəyik”.
İLKİN SULTANLI
Digər xəbərlər
