Çox qol vurdular və dalaşdılar
Mayın 19-20-də konfrans yarımfinalı çərçivəsində növbəti oyunlar keçirildi.
“Kalqari” – “Edmonton” oyununda 15 qol vuruldu. Bu oyun pley-off tarixinə 5-ci ən məhsuldar görüş kimi düşdü. Sonuncu dəfə 15 qol 1993-cü ildə - “Los-Anceles” – “Kalqari” (9:6) oyununda vurulmuşdu. 15 qolun vurulduğu daha üç oyun var. Pley-offun məhsuldarlıq rekordu usə 1982-ci ildə - “Edmonton” – “Los-Anceles” (8:10) oyununda qeydə alınıb. “Kalqari” – “Edmonton” oyunu təkcə yüksək məhsuldarlıqla yadda qalmadı. İş ondadı ki, son saniyələrdə buz üzərində kütləvi dava-dalaş başladı. Sona 10 saniyə qalmış “Kalqari”nin forvardı Milan Luçiç “Edmonton”un hokkeyçisinin ayağına çubuqla zərbə vurmağa çalışdı. Bunu görən Zak Kassian Luçiçin üzərinə şığıdı. Hakim onları ayırmağa çalışdığı məqamda başqaları da davaya qoşuldu. Maykl Sotun, Brett Ritçi, Mikael Baklund, Nikita Zadorov, Coş Arçibald, Rayan Maklaud və Dankan Kit baş rollarda idi.
“Kalqari”nin baş məşqçisi Feril Satter “Edmonton” üzərindəki qələbəni belə şərh etdi:
“Bizə deyirlər ki, əvvəlki seriya (“Dallas” – 4:3) sönük olub. Bu üzdən dünən uşaqlara dedim ki, bu gün 7-10 qol vurmalıyıq. Onu da dərk edirdim ki, rəqib də belədə çox qol vura biləcək”.
Aşağıdakı statistikadan göründüyü kimi, “Tampa-Bey” konfrans finalına çıxmağa daha yaxındı. Bu komanda “Florida” ilə seriyanın 2-ci oyununda qələbə qolunu sona 4 saniyə qalmış vurdu. Bu qolun müəllifi Ross Kolton oyunun ilk ulduzu sayıldı.
