Azərbaycanlı rəssam Əli Miri maraqlı jestilə diqqəti çəkib.

Tanınmış incəsənət xadimi "Beşiktaş"ın futbolçusu Miraləm Pyaniçə portretini hədiyyə edib. Klubun bazasında bosniyalı yarımmüdafiəçi ilə görüşən rəssamın bu jesti məşhur futbolçunun xoşuna gəlib. Pyaniç onunla birgə şəklini şəxsi "instaqram" hesabında paylaşıb. Bundan başqa, "Beşiktaş"ın bu sosial şəbəkədəki səhifəsi də portreti izləyiciləri ilə bölüşüb. Prosesin necə baş verdiyini öyrənmək üçün tanınmış rəssamla əlaqə saxladıq.

- Necə oldu ki, Miraləm Pyaniçlə görüşüb, ona portretini hədiyyə etdiz?
- Uşaqlıqdan “Beşiktaş” azarkeşiyəm. Bakıda yaşayanda Türkiyəyə tez-tez komandanın oyunlarını izləməyə gedirdim. 5 il öncə İstanbula köçdüm. Burda fəaliyyət göstərirəm. Hazırda şou-biznes nümayəndələri ilə əlaqəm var. Bu səbəbdən də Pyaniçlə görüşmək çox da çətin olmadı. “Beşiktaş”ın fanklubları ilə əlaqələrim var. Tablonu əvvəlcədən hazırladım. Fanklublardakı dostlarımdan xahiş etdim ki, bu görüşü təşkil etsinlər. İndi də çalışacam ki, bütün komanda üçün nəsə hazırlayıb, kluba hədiyyə edim.

- Bu fikrinizlə bağlı “Beşiktaş” rəhbərliyi ilə razılaşmısız?

- Yox, kluba nəsə deməmişəm. Bunun üçün vaxtım olmaya da bilər. Yalandan vəd vermək istəmirəm. Təklif etsəydim, əlbəttə, qəbul etməzdilər.

- Portret hədiyyə etməyiniz Pyaniçin ad günü ilə bağlı idi?
- Xeyr. Pyaniçin portretini hazırlamaq çoxdan fikrimdə var idi. Sadəcə, vaxt ayıra bilmirdim. Sosial şəbəkələrdə gördüm ki, futbolçunun ad günüdü. Dedim fürsətdən istifadə edib, portretini hazırlayım. Pyaniç dünya ulduzudu. Onunla görüşməyi bütün futbol azarkeşləri istəyir.

- Görüşdə nələr yaşandı ? Məşhur futbolçu ilə nə haqda danışdız?
- Pyaniç, ümumiyyətlə, səmimi insandı. Onun şəklini bir “instaqram” səhifəsində görmüşdüm. Onun üzərində portreti hazırladım. Hədiyyəni çox bəyəndi. Sağ olsun, fanklubumuzun forması ilə birgə şəkil çəkdirdik. Sonra öz telefonu ilə portretlə bir fotomuzu çəkdi. Bunu “instaqram”da da paylaşıb. Bu zaman “Beşiktaş”ın media işləri ilə məşğul olan şəxs yanımıza gəldi. O da fotoapartla şəklimizi çəkib, “Beşiktaş”ın rəsmi səhifələrində paylaşdı.

- Bu hadisə Azərbaycan futbol camiəsində personanıza marağa səbəb oldumu? Hansısa futbolçu və ya klub rəsmisi sizə nəsə yazmayıb? Bəlkə hansısa oyunçu onun portretini çəkib hədiyyə etməyinizi istəyib?
- İstanbulda olduğum 4-5 il ərzində bir çox futbolçularla tanış olmuşam. Amma hamısı Türkiyədə çıxış edənlərdi. Yaxın zamanlarda böyük sərgim olacaq. Orda Acun Ilıcalı da iştirak edəcək. Azərbaycanda ötən il ilin ən yaxşı rəssamı seçilmişəm. Həmin diplomu mənim əvəzimə qardaşım götürüb. Amma bu illər ərzində ölkə futbolundan kimsə mənimlə maraqlanmayıb. Sadəcə, iki-üç şou-biznes nümayəndəsi Pyaniç məsələsinə görə təbrik etdi. Onlardan biri də popçu Murad Arif idi. Amma yenə deyirəm, futbolçulardan kimsə maraqlanmayıb. Hədiyyə məsələsi elə bir şeydi ki, ürəkdən gəlməlidi. Pyaniçin azarkeşi olduğuma görə belə jest etdim.

- Azərbaycan futbolu ilə bağlı iş görmək istəyirsiz?
- Bakıda doğulduğum üçün “Neftçi”yə azarkeşlik edirəm. Azərbaycan futbolu ilə bağlı fikrimdə heç nə yox idi. Amma sizin sualınız maraqlı gəldi. Ola bilər ki, bu haqda düşünüm. Ruslan Abışovla əlaqəm var. Bəlkə onunla bağlı nəsə hazırladım. Azərbaycan futbolu ilə bağlı ümumilikdə nəsə işləsəm, mütləq “Neftçi”yə aid olacaq.

- Omar Momanini tanıyırsız? Siz də onun kimi futbol sahəsində tanınmaq istəyərsiz? Bəlkə Azərbaycan futbolunu belə işlərlə daha çox işıqlandırmaq olar?
- Omarı tanıyıram, karikaturaçıdı. Mizah anlayışı ilə futbolla bağlı işlər araya-ərsəyə gətirir. Demək olar ki, bütün dünya onu tanıyır. İşlərini həqiqətən çox bəyənirəm. Amma mən tablo rəssamıyam. İşlərim əsasən sərgilərdə nümayiş olunur. İstanbulda bu işə divar rəsmləri ilə başladım. Bundan sonrakı düşüncələrim ancaq bu istiqamətdədi. Fantaziyamdan istifadə edib, əsərlər yaratmaq istəyirəm. Amma ölkə futbolu ilə bağlı maraqlı təklif gələrsə, əlbəttə, düşünərəm.

İLKİN SULTANLI