MHL-in saytı ikiqat olimpiya çempionu Patrik Marlonun karyerasını bitirdiyi haqda xəbər yayıb.

1997-ci il draftında “San-Xose”nin seçdiyi kanadalı əfsanə oyun sayına (1779) görə MHL rekordçusudu. O, karyerası boyunca 566 qol vurub, ümumilikdə 1197 xal toplayıb. Marlo “San-Xose” ilə yanaşı, “Toronto” və “Pittsburq”un da şərəfini qoruyub. Kanada yığması ilə 2010, 2014-cü illərdə olimpiya, 2003-də dünya çempionu olan 42 yaşlı hokkeyçi MHL-in cari mövsümünü burxıb.

Mayın 9-da “Aylenders”in baş məşqçisi postundan qovulan Barri Trots növbəti mövsümdən “Vinnipeq”i çalışdıra bilər. “Cets” rəhbərliyi tezliklə 59 yaşlı mütəxəssislə danışıqlara başlamaq niyyətindədi. 1998-dən MHL-də məşqçi kimi fasiləsiz çalışan Trots “Neşvill” və “Vaşinqton”un da “sükanı arxasında” olub, paytaxt klubunu 2018-də Stenli kubokunun qalibi edib. “Vinnipeq”də baş məşqçinin səlahiyyətlərini yerinə yetirən Deyv Laurinin mövsümlərarası dövrdə klubu tərk edəcəyi bir neçə gün əvvəl açıqlanıb. Komandanın baş məşqçisi Pol Moris isə 2014-dən tutduğu postdan dekabrda istefa verib.
Bu arada “Minnesota” ilə seriyanı 4:1 öndə bitirən “Sent-Luis” konfrans yarımfinalına vəsiqə qazanıb.

“Blyuz”un bu mərhələdəki rəqibi “Neşvill”i mübarizədən kənarlaşdıran (4:0) “Kolorado” olacaq.