Obradoviç gələcəyi haqda heç nə bilmir - AÇIQLAMA
21 yaşadək futbolçulardan ibarət yığma iyunda üç vacib oyun keçirəcək.
Avropa çempionatının seçmə mərhələsində ayın 3-də “Estoniya”nın, 7-də Finlandiyanın, 14-də isə Norveçin qonağı olacağıq. Görəsən, yığmanın bu görüşlərdə hədəfi nə olacaq? Milan Obradoviçin komandası nə vaxt hazırlığa başlayacaq? Bu məsələ ilə bağlı fikirlərini öyrənmək üçün serbiyalı mütəxəsislə əlaqə saxladıq: “Növbəti bazar günü hazırlığa başlayacağıq. Bakıda yoxlama oyunları keçirəcəyik. Mayın 26-da Küveytin 21 yaşadək futbolçulardan ibarət yığması ilə qarşılaşacağıq. Daha sonra seçmə mərhələdəki 3 görüşün hazırlığını davam etdirəcəyik. Əvvəlcə hansı futbolçuları yığmaya dəvət edəcəyimi bilməliyəm. Çünki bəzi oyunçular əsas milliyə dəvət ala bilər. Növbəti həftə kimlərin xidmətindən yararlanacağım dəqiqləşəcək. Bu qarşılaşmalarda xallar qazanmaq istəyirik. Estoniyanı məğlub etmişik, Finlandiya ilə bərabərə qalmışıq. Norveçə qarşı da yaxşı mübarizə aparmışıq. Onlar səhvlərimizdən yararlanıblar. Düşünürəm ki, bizdən güclüdülər. Amma bu rəqibi də məğlub edə bilərik. Təbii ki, əsas məsələ keyfiyyətli oyun sərgiləməkdi. Bunun üçün mübarizə aparacağıq”.
Maraq üçün bildirək ki, iyunun 15-də Obradoviçin AFFA ilə müqaviləsinin müddəti başa çatacaq. Yeni sözləşmə ilə bağlı isə yenilik yoxdu. Əldə etdiyimiz məlumata görə, AFFA serbiyalı ilə yola davam etmək istəmir. Obradoviç özü də hansısa klubu və ya əsas yığmanı çalışdırmaq niyyətindi: “AFFA ilə müntəzəm danışıq aparıram. Qarşıdakı həftələrdə hər şeyə aydınlıq gələcək. Gələcəyim AFFA ilə danışıqlardan asılıdı. Əvvəlcə müqaviləmi başa vurmalıyam. Bundan sonra federasiya ilə bəzi məsələləri müzakirə etməliyəm. Daha sonra gələcəyim haqda qərar verəcəm. Əlbəttə, bu, AFFA-nın təklifindən asılı olacaq. Mən bütün təkliflərə açığam. 3 ildən çoxdu burdayam. 21 yaşadək milli komandanı çalışdırıram. Burdakı mentallığı bilirəm. Azərbaycan futbolçularını, insanını yaxşı tanıyıram. Serbiyada da yaxşı təcrübə keçmişəm. U-17, U-19 və əsas yığmada çalışmışam. Dünya çempionatında iştirak etmişəm. Mütəxəssislik üçün lazım olan təcrübəni qazanmışam. Amma indi bu haqda nəsə deyə bilmərəm. Çünki mənə konkret heç nə deyilməyib. Qarşıda bir aydan çox vaxt var. Mənim üçün əsas məsələ oyunlardı. Yaxşı nəticə əldə etmək istəyirəm. Mən də gələcəyimi düşünməliyəm. Amma tələsmirəm. Gözləyək, görək nə olacaq”.
İLKİN SULTANLI
Digər xəbərlər
