“Qarabağ” rəhbərliyi “İmarət”in şüarlarına nə vaxta qədər dözəcək? - AÇIQLAMA
Artıq neçəci dəfədi ki, “Qarabağ” azarkeşlərinə görə ziyana düşür.
Hər dəfə də “İmarət”in üzvləri kimisə təhqir edir - ya Elçin Məsiyevi söyürlər, ya da hansısa klubun futbolçularını. Bu dəfə isə fanklubun bəzi üzvləri “Sabah”la görüşdə rəqibin oyunçularını söyüb, hətta matçdan sonra klubun operatoru Dadaş Zeynalova fiziki xəsarət yetiriblər. Bu səbəbdən də AFFA İntizam Komitəsi klubu cərimələyib. Görəsən, bu hərəkətlərə “dur” deyən olacaqmı? Klub rəhbərliyi bunun baş verməməsi üçün fanklub üzvləri ilə söhbət edəcəkmi? Axı “Qarabağ” bizim üçün həmişə örnək olub. Qurban Qurbanovun “Marsel”lə oyunda verdiyi qərar bütün dünyada müzakirə olundu, ölkə başçısı İlham Əliyev dəfələrlə “Qarabağ”ı başqalarına nümunə göstərib. Nə üçün “İmarət” bu fəaliyyətə kölgə salır? Fanklubun hərəkətlərinə görə dəfələrlə “köhlən atlar” ziyana düşüb. Bu pullar hansısa kommunal xərclər, sosial layihələr üçün ayrıla bilər, şəhid və qazi ailələrinə yardım edilər. Bu yöndə fikirlərini öyrənmək üçün “Qarabağ”ın mətbuat xidmətinin rəhbəri Gündüz Abbaszadə ilə əlaqə saxladıq:
“İlk növbədə onu deyim ki, fanklub müstəqil olsa da, “Qarabağ”a rəsmi bağlılığı olmasa da, biz onları camiəmizin üzvləri kimi qəbul edirik. Əbəs yerə onlara "12-ci oyunçu" deyilməyib. “Qarabağ”ın tərbiyəsi, əxlaqı, fəlsəfəsi hər kəsə bəllidi. Bunu özünüz də etiraf edirsiz. Buna görə də sizə təşəkkür edirəm. Heç kim “Qarabağ” camiəsi haqda danışarkən “tərbiyəsiz” ifadəsini dilinə gətirməməlidi. Azarkeşlərimizin son oyunda etdiklərini nəzərdə tutursuzsa, tərbiyə meyarı bununla ölçülmür. Etik normalardan kənara çıxmağı nəzərdə tutursuzsa, bu, bütün klubların oyunlarında olub. Bundan sonra da olacağı istisna edilmir. Belə hadisələrə nəinki Azərbaycanda, bütün dünyada rast gəlinməkdədi. Heç bir halda təhqirə haqq qazandırmırıq. Hüquqi cəhətdən də bu, inzibati xətadı. Buna görə də klubumuz cəzalanıb. Cəriməni də ödəyəcəyik. Bundan sonra da klub olaraq belə halların təkrarlanmanması üçün əlimizdən gələni edəcəyik. Təbii ki, biz də klub olaraq, belə halların baş verməsinə qarşıyıq. Sualınızın sosial layihə hissəsinə gəlincə, demək istərdim ki, bir əlin verdiyini digəri bilməməlidi. Onsuz da biz bu məsələdə çox həssasıq. Bunu bilənlər bilir. “Qarabağ”ın müsbət imicinin formalaşmasında klubumuzda çalışan şəxsiyyətlərlə yanaşı, azarkeşlərimizin də rolu az olmayıb. Fərdlərə görə azarkeşlərimizin hamısına tərbiyəsiz deyilməsini yolverilməz hesab edirəm”.
Gündüz bəyə həmişə hörmətimiz olub. Belə də davam edəcək. Görünür, işlədiyi kluba dəstək olan fanklubu müdafiə etməyə çalışır. Sualın əvvəlində bildirmişik ki, burda azarkeşlər deyiləndə sırf “İmarət”in bəzi üzvləri nəzərdə tutulur. Bizim bütün “Qarabağ” azarkeşləri ilə işimiz yoxdu. Elə “İmarət”in özündə də hörmət etdiyimiz şəxslər çoxdu. Məhz bu fanklubdab Məhəmməmədli İbrahimli kimi canını vətən üçün fəda edən qardaşımız çıxıb. Bu fanklub tez-tez Allahverdi Bağırovu yad edir, dəfələrlə maraqlı sosial tədbirlər həyata keçiriblər. Amma indi nədənsə təhqiramiz şüarlar səsləndirirlər. Bax, bizi narahat edən məqam budu!
İLKİN SULTANLI
Digər xəbərlər
