Elçin Məsiyev təhqir olunur, “Qarabağ” ziyana düşür - AÇIQLAMA
Premyer-liqanın 21-ci turunda "Qarabağ" "Səbail"i məğlub etdi - 5:1.
Matçda diqqətimizi çəkən bir məsələ oldu. "İmarət Tayfa" azarkeş qrupu bir neçə dəfə 4-cü hakim Elçin Məsiyevin ünvanına xoşagəlməz ifadələr səsləndirdi. Fanklub artıq bunu adət halına çevririb. Hətta bir dəfə buna görə Ağdam təmsilçisi AFFA İntizam Komitəsi tərəfindən cərimələnib.
Görəsən, azarkeşləri kluba ziyan vurmağa nə vadar edir? Sualımızı "İmarət Tayfa"nın idarə heyətinin üzvü Elnur Quliyevə ünvanladıq: "Son zamanlar oyunlarda az oluram. Bu üzdən fikir bildirməyim o qədər də yaxşı deyil. Ötən dəfə də demişdim, kiminsə təhqir olunmasına qarşıyam. İstər hakim, istər futbolçu səhvi olsun, bu düzgün deyil. Özümü həmişə onların yerinə qoyuram. Çünki səhvsiz insan yoxdu. Hakimlərin, eləcə də futbolçuları səhv etməmək şansı azdı. Bəzən bu səhvlər ciddi problemlərə yol açır. Çünki bu, bir tərəfin lehinə, digərinin əleyhinə olur. Zərər görən tərəf bunu, təbii ki, aqressiv qarşılayır. Amma yenə də təhqir etmək olmaz. Özümü həmin hakimin və ya futbolçunun yerinə qoyuram. O sözləri ailəm eşitsə, necə olar? Hətta qərəz olsa belə, təhqir etmək düzgün deyil. Başqa yollarla bunu etmək olar. Məsələn, sosial şəbəkə üzərindən etik çərçivədə təzyiq etmək mümkündü. Bunlar mənim insanı fikirlərimdi".
Qeyd edək ki, 18-ci turun “Qarabağ” – “Qəbələ” oyununda (5:1) meydan sahiblərinin azarkeşləri tərəfindən kütləvi şəkildə baş hakim Elçin Məsiyevin ünvanına təhqiramiz ifadələr işlədildiyi üçün klub 4000 manat cərimə olunub.
GÜNAY VƏLİYEVA
