"İmarət Tayfa"nın rəsmisi hakimi təhqir edən gənc üzvlərini qınadı - AÇIQLAMA
Həftəsonu İntizam Komitəsinin qərarları açıqlandı.
Premyer-liqanın 18-ci turunda keçirilən “Qarabağ” – “Qəbələ” oyununda “Qarabağ” azarkeşləri tərəfindən kütləvi şəkildə hakimin ünvanına təhqiramiz ifadələr işlədildiyi üçün klub 4000 manat cərimə olundu. Sözügedən fanatlar "İmarət Tayfa"nın üzvləri idi. Görəsən, Ağdam təmsilçisinin azarkeş qrupu kluba böyük məbləğdə ziyan vurmasını necə əsaslandırır? "İmarət Tayfa"nın idarə heyətinin üzvü Elnur Quliyev "Football-plus.az" saytına bunları söylədi:"Mən həmin oyunda olmamışam. Gənc "İmarət"çilər olub. Bilmirəm, hansı epizoda belə reaksiya veriblər. Bəlkə də haqsızlıq olub, gənc üzvlərimiz emosiyalarını saxlaya bilməyiblər. Haqq qazandırmıram buna. Mən hakimin təhqir olunmasına qarşıyam. Çünki hakimlər də səhv edə bilər. Özümüz TV-dən baxdıqda belə elə epizodlar var ki, düzgün qərar verməkdə çətinlik çəkirik. Peşəkar hakimlərin belə fikrinin haçalandığı məqamlar olur. Referini təhqir etmək yaxşı hal deyil. Hakim də insandı. Biz həyatda nə qədər səhvlər edirik, hakimin də meydanda səhv etməsi normaldı. Üstəlik, söhbət vacib qərar verməkdən gedirsə, daha çətindi. Qərəz olarsa, qınayaram. "Qarabağ" bir mədəniyyət forması formalaşdırıb. Maksimum dərəcədə haqsızlığa qarşı olsa da, bunu mədəni şəkildə bildirir. Biz də klubun azarkeşləri olaraq elə etsək, daha yaxşı olar. Haqsız qərarla üzləşəndə 4-5 min manatlıq cəriməni düşünmürsən. Gənc üzvlərimizə tez-tez deyirik ki, kluba maksimum dərəcədə ziyan vurmamağa çalışaq. Bizim komandadı, faydalı olmağa çalışaq. Hətta rəqibin ünvanına xoşagəlməz nələrsə deyəndə, təcrübəli üzvlərimiz buna qarşı olur. Gəncləri yönləndirmək çətindi. Amma çox yaxşı işləri də var. Bu da danılmazdı".
GÜNAY VƏLİYEVA
