Asim Xudiyev Şuşanı planlaşdırdı, Suqovuşana getdi
Suqovuşanda keçirilən “Prezident Kuboku-2022”də qonaq qismində iştirak edənlərdən biri də beynəlxalq dərəcəli hakim, hazırda çempionat oyunlarına hakim-inspektor kimi təyinat alan Asim Xudiyev idi.
Reqatanın gedişində imkan tapıb onunla da söhbətləşdik: “Azərbaycan Kanoe və Avarçəkmə Federasiyasından AFFA-ya Suqovuşanda keçirilən "Prezident Kuboku-2022" yarışı üçün dəvət gəlmişdi. AFFA-dan mən və İsgəndər Cavadov Suqovuşana bunun üçün ezam olunmuşuq. Ölkə başçısı cənab İlham Əliyev və birinci vitse-prezident Mehriban xanın Əliyeva bura gələndə tövsiyə etmişdi ki, Suqovuşanda yarış təşkil olunsun. Budu, həmin yarış artıq təşkil olunur. Düşünürəm ki, bura gələn iştirakçı ölkələrin təmsilçiləri də məmnundu. Çünki ilk beynəlxalq yarışın iştirakçısı olmaqla tarixə düşürlər. Əminəm ki, bu yarış ənənə halını alacaq və növbəti illərdə iştirakçıların sayı bundan çox olacaq”.
Asim bəy yaxın vaxtlarda Şuşaya səfər etmək istədiyini də bildirdi: “Özüm əslən Şuşa-Ağdam bölgəsindənəm. Amma indiyədək işğaldan azad olunan yerlərə səfər edə bilməmişdim. Bu ay dostlarımla Şuşaya avtobusla səfər etməyi planlaşdırırdım. Amma Suqovuşan onu qabaqladı. İnşallah, Şuşaya da yaxın vaxtda gedərəm. Suqovuşana gələn kimi də şəkil çəkdirib evə göndərdim. Çünki bilsinlər ki, bura təhlükəsizdi və Azərbaycan əsgərləri bu ərazidə layiqli şəkildə xidmət aparırlar".
RƏŞAD, Suqovuşan
Digər xəbərlər
