“Qəbələ”nin qış fasiləsindən sonra eniş yaşamasının əsas səbəbi Elmar Baxşıyevin cəza və zədə səbəbindən meydana optimal heyət çıxara bilməməsidisə, daha bir səbəb maliyyəyə söykənir.

“Football-plus.az” saytına daxil olan məlumata görə, “qırmızı-qaralar”ın futbolçuları martdan bəri maaşa həsrətdi. AFFA bölgə təmsilçisinə bu yöndə kömək edəcəyini bildirsə də, çempionatın həlledici məqamında vədini yerinə yetirmir. Kluba yaxın mənbələrdən əldə etdiyimiz məlumata görə, “Qəbələ”nin futbolçuları yalan vədlərdən o qədər beziblər ki, artıq məşqlərə də çıxmaq istəmirlər.
Mənbəmizin sözlərinə inansaq, assosiasiya rəhbərliyi “Qəbələ” rəsmilərinə “SOCAR “Qəbələ”yə pul ödəmək istəmir” şəklində ismarıc göndərib. “Qəbələ”nin futbolçuları maaşa həsrət qalır və düşərgədə narazılıq baş qaldırır. Bütün bunlar da bölgə təmsilçisinin çempionat oyunlarına təsir göstərir. Hər halda, "Qəbələ"nin avrokubok şansı tam bitməyib. Unutmayaq ki, komanda bu yolda əsas rəqibi olan "Sabah"la son turda evdə qarşılaşacaq.

RƏŞAD