Binə stadionunun rəhbərliyi Ruslan Həmidovdan polisə şikayət etməyib.

Aprelin 28-də AFFA İntizam Komitəsinin növbəti iclası keçirilib. Maraqla gözlənilən məsələ Region Liqasının 1/4 finalının cavab görüşü çərçivəsində baş tutan “Cəbrayıl” - “Energetik” matçında başverənlərlə bağlı açıqlanacaq qərarlar idi. Bildiyiniz kimi, görüşdə əsas hakim Rövşən Rəcəbov mingəçevirli futbolçular tərəfindən döyülmüşdü. İntizam Komitəsi qarşılaşma ilə bağlı sərt cəzalar verib:

1. “Cəbrayıl”ın futbolçusu Nurlan Həsənov qeyri-idman hərəkətinə görə ikinci sarı vərəqə ilə meydandan kənarlaşdırıldığı üçün 1 oyun cəzalanıb.
2. “Energetik”in rəsmisi Ruslan Həmidov hakimlər briqadasını təhqir etdiyi üçün 5 oyun cəzalanıb.
3. 90+3-cü dəqiqədə “Energetik”in futbolçusu Elvin Əlizadə hakimlər briqadasını təhqir etdiyi və referiyə fiziki təsir göstərdiyi üçün 14 oyun cəzalanıb.
4. 90+3-cü dəqiqədə “Energetik”in futbolçusu Allahverdi Allahverdiyev hakimlər briqadasını təhqir etdiyi və referiyə fiziki təsir göstərdiyi üçün 14 oyun cəzalanıb.
5. 90+3-cü dəqiqədə “Energetik”in futbolçusu Tural Məmmədzadə hakimlər briqadasını təhqir etdiyi və referiyə fiziki təsir göstərdiyi üçün 14 oyun cəzalanıb.
6. 90+3-cü dəqiqədə “Energetik”in cəzası davam edən futbolçusu Orxan Əlibabayev hakimlərə fiziki təsir göstərdiyi üçün 10 oyun cəzalanıb.
7. 90+3-cü dəqiqədə oyun yarımçıq dayandırıldığına görə “Energetik”ə 0:3 hesablı texniki məğlubiyyət verilib.

Bundan başqa, klubun prezidenti Ruslan Həmidova görüşdəki hərəkətləri ilə bağlı Xəzər Rayon Polis İdarəsində Cinayət Məcəlləsinin 221-ci (xuliqanlıq) maddəsi ilə iş açıldığı haqda xəbərlər yayılıb. Belə ki, klub rəsmisi komandası ümumi nəticədə uduzandan sonra yerli azarkeşlərlə dalaşıb, daha sonra isə stadionun hamamındakı şüşəni sındırıb. Həmidov bu zaman özü də xəsarət alıb. Faktla bağlı araşdırmalar davam etdirilir.
Başverənlərə münasibət bildirməsi üçün Ruslan Həmidovla əlaqə saxladıq. Klub rəsmisi ilə həm özünün, həm də komandanın gələcəyi ilə bağlı söhbətləşdik.

- AFFA İntizam Komitəsinin qərarları ilə tanışsız. Cəzalarla razısız?

- Əlbəttə. Ötən dəfə elə sizə müsahibəmdə demişdim ki, oyunçularım qeyri-peşəkarlıq ediblər. AFFA nə cəza verirsə, yaxşı edir. Özlərini idarə edə bilmədilər. Dalaşıblar, böyük qələt ediblər. Bütün qərarlarla razıyam. Mənimlə bağlı isə anlaşılmazlıq olub. Amma ona da razıyam. Bəli, səhvə yol verib güzgünü sındırmışam. Lakin hakimi təhqir etməmişəm. Vallah, referini söyməmişəm. Amma cəza verilibsə, bunu çəkməyə razıyam. Futbolçular isə düz hərəkət etmədilər. Bunun da səbəbi qeyri-peşəkar olmalarıdı. Onlar böyük futbol görməyiblər. Necə olur ki, 4200 nəfərin qarşısında bir hadisə yaşanmır, amma 600 nəfərlik stadionda dava-dalaş düşür? Hakimin qərarları da burda rol oynadı. Qardaş, vallah, “Cəbrayıl”ın yüzfaizlik penaltisi verilmədi. Cavid Hüseynova hörmətim var, haqqı deməliyəm. Amma onların da qapısına penalti verilmədi. Görüntülər də var. Hakimin belə etməsi işləri daha da qəlizləşdirdi. Mən öz şəhərimdə təhlükəsizliyi təmin etdim. Xırda insident oldu, bütün polisləri meydana tökdüm. Rövşən Əhmədovla birgə əlimizdən gələni etdik ki, qalmaqal yaşanmasın. Amma Bakıda, o qədər camaatın qarşısında tək heç nə edə bilmədim.

- Sizinlə bağlı cinayət işi açılıb. Kim şikayət edib?

- Heç kim. Hadisələr zamanı əsəbləşib, Binə stadionundakı şüşəni qırdım. Orda olan polislər izahat aldılar. Mən də cəriməmi ödədim. Sırf başverənlər səbəbindən cinayət işi açılıb. Yaxın günlərdə bu məsələ həll olunacaq. Binə stadionunun direktorundan da soruşa bilərsiz, dəymiş ziyanı ödəmişəm. Heç kimə zərər verməmişəm. Hələ öz əlimdə vətərlər kəsilib. Sağ olsun stadion rəhbərliyi, məndən şikayətçi olmayıb.

- Düşünürsüz ki, bu, sizə qarşı klub daxilində təxribat idi?

- Yox, qətiyyən. Hamısı öz uşaqlarımızdı. Onlar da peşmandı. AFFA İntizam Komitəsi qərarları açıqlamamış komandadan uzaqlaşdırmışam. İndi yazıq-yazıq yanımda dayanıblar. Mənə deyirlər ki, ay Ruslan, biz nə etdik?! Çünki hamısı qeyri-peşəkar futbolçudu. Ordan-burdan yığmışdım onları. 5 il idi öz hesabımıza komanda saxlayırdıq. Amma indi olanlara görə bizi pis adlandırırlar. Nə qədər əziyyət çəkdiyimizi bilmirlər.

- AFFA İcraiyyə Komitəsinin qərarı ilə növbəti mövsümdən “Mingəçevir” 1-ci divizionda iştirak edəcək. Bəlkə sizi klubdan uzaqlaşdırmaq üçün belə ediblər?

- Əvvəlcə AFFA-ya, əsasən də Elxan Məmmədov, Sərxan Hacıyev və Yusif Vəliyevə təşəkkür edirəm ki, bizə inandılar, dəstək oldular. Növbəti mövsümdən “Mingəçevir” 1-ci divizionda çıxış edəcək. Rövşən Əhmədovla birgə yeni klub yaratmışıq. Sənədlər Ədliyyə Nazirliyinə təqdim olunub və qeydiyyata alınıb. İnşallah, hər şey möhtəşəm və peşəkar olacaq.

- Bəs “Energetik”?

- Mənə “Energetik” lazım deyil. “Azərenerji” bizə maddi yardım etmirsə, heç onların adını da istəmirik. Bu gündən komandanı dağıdırıq. Mingəçevir üçün yeni klub yaranıb. Hər şey daha yaxşı və peşəkar olacaq.

- Komandada struktur necə formalaşacaq?

- Müşahidə Şurası olacaq. Orda bəzi şəxslər yer alacaq. Mingəçevirdəki stadionda iyuldan təmir başlayacaq. Hamı bizi qınayır ki, ot örtüyü suni olacaq. Amma belə deyil. Təbii örtük olacaq. Diviziondakı oyunlar başlayana kimi hər şey qaydasına düşəcək. Bizə ayrılan pulla müxtəlif bölgələrdən 16-22 yaş aralığında futbolçuları komandaya cəlb edəcəyik. Futbolun İnkişaf Fondu da bu işlərdə dəstək olacaq. Yayda yenə onlarla görüşəcəyik. Bir daha demək istəyirəm ki, Elxan Məmmədov, Sərxan Hacıyev və Yusif Vəliyev çox sağ olsun. Onlar 5 ildi çəkdiyimiz əziyyəti itirmədilər.

- “Mingəçevir”in Müşahidə Şurasında yer alacaqsız?

- Bu məsələlərin hamısı həll olunacaq. Niyə yer almamalıyam? İllərdi bu şəhər üçün əziyyət çəkirəm. Çayçısı, taksi sürücüsü, fəhləsi Mingəçevirdə məni görəndə ayaq saxlayıb, təşəkkür edir. Elxan Məmmədovla görüşdə də dedim ki, iş adamları məni görəndə yollarını dəyişir. O da söylədi ki, deməli, yaxşı işləyirsən. Bunların hamısı mənim üçün fəxrdi. Biz Region Liqasında çıxış edə-edə, komandaya sevgini qaytarmışıq. 4000-dən çox adam gəlir matçlarımıza. Bunların hamısı əziyyətimizin bəhrəsidi. Amma qeyd etdiyiniz məsələyə yaxın vaxtlarda aydınlıq gələcək.

İLKİN SULTANLI