Region Liqasının 1/4 finalının cavab görüşü çərçivəsində baş tutan “Cəbrayıl” - “Energetik” matçında baş verən dava ilə bağlı söz-söhbətlər səngimək bitmir.

Hakim Rövşən Rəcəbovun döyüldüyü oyundan sonra Mingəçevir təmsilçisinin prezidenti Ruslan Həmidova cinayət işi açılıb. Buna aprelin 24-də AFFA-ya məxsus Binə qəsəbə stadionunda baş verən insident səbəb olub. Həmin gün arenada keçirilən “Cəbrayıl” – “Energetik” oyunundan sonra qonaq klubun prezidenti, 1986-cı il təvəllüdlü Ruslan Həmidovun hərəkətləri ilə bağlı Xəzər Rayon Polis İdarəsində Cinayət Məcəlləsinin 221-ci (xuliqanlıq) maddəsi ilə iş açılıb. Belə ki, klub rəsmisi komandası ümumi nəticədə uduzduqdan sonra yerli azarkeşlərlə dalaşıb, daha sonra isə stadionun hamamındakı şüşəni sındırıb. Həmidov bu zaman özü də xəsarət alıb. Faktla bağlı araşdırmalar davam etdirilir.

Qeyd edək ki, oyun Region Liqasının 1/4 final mərhələsinin cavab görüşləri çərçivəsində keçirilib. 0:0 hesabı ilə davam edən qarşılaşmada Mingəçevir təmsilçisinin futbolçuları baş hakimə etiraz ediblər, daha sonra onu döyüblər. Bundan sonra fit sahibi qarşılaşmanı dayandırıb.

Məsələ ilə bağlı Ruslan Həmidovla əlaqə saxladıq. O, informasiyanı təsdiqləsə də, hələ ki mediaya bu barədə açıqlama verməyəcəyini dilə gətirdi.

İLKİN SULTANLI