O məşhur “umom Rossiyu ne ponyat, arşinom ne izmerit” ifadəsi var e, məndən olsaydı, lənətəgəlmiş ölkənin adını ordan çıxarar, Azərbaycan futbolunu qoyardım.

Bəzən elə qəribə hadisələr baş verir ki, həmin şeiri yazan Fyodor Tyutçevi qəbirdən çıxarıb, “sən canın, misraları dəyiş” demək istəyirsən.
Son günlərin yalnız bir neçə hadisəsindən danışacam. Deməli, aprelin 13-də keçirilən “Turan Tovuz” – “Kəpəz” oyununda qonaq, yəni gəncəli azakeşlər üzərində “nəticələriniz gözümüzü YAŞARdır” yazılan plakat açıblar. Nizami Gəncəvinin yerliləri “Kəpəz”in sıralanan uğursuzluqlarına bədii-poetik yanaşma ortaya qoyub. AFFA İntizam Komitəsi isə komandanın baş məşqçisi Yaşar Vahabzadənin adının bu şəkildə hallanmasına, “ş” hərfinin yerində dollar işarəsinin qoyulmasına qazanc mənbəyi kimi baxıb və “Kəpəz”ə 160 manat cərimə kəsib. Komitənin rəhbəri Erkin Hüseynov iddia edir ki, “azarkeşlər görüş əsnasında plakat qaldırmaq istəyirlərsə, oyunöncəsi, fasilədə, matçdan sonra görüləcək tədbirlərlə bağlı PFL-ə müraciət etmək, bütün pankartlar və plakatlar üçün PFL-dən icazə almaq lazımdı". Bax, bu məqamda nəinki Qəribi, hətta Əslini də, Leylini də, Şirini də - nakam məhəbbət yaşayan, eləcə də bundan sonra tribunalarda sevgisini izhar etmək fikrinə düşəcək hər kəsi ağlamaq tutur. Məsələn, bir qədər sonra PFL Əsasnaməsinə “mən səni sevirəm” ifadəsinin milli-mənəvi dəyərlərə zidd olduğuna, mentallığımızı korladığına dair bənd salsa, heç kim təəccüblənməyəcək. Ardından futbolçu xanımlarına yaşıl meydanda olan həyat yoldaşlarına öpüş göndərmək qadağası qoyulacaq, bir qədər sonra qonşu İranda olduğu kimi xanımlar hicaba sarılacaq, kişilər isə meydana yapıncı və uzunboğaz çəkmə ilə çıxacaq ki, ayıb yerləri görünməsin. Nə bilmişdiz, idarə olunan demokratiya rejimi belə olur da!

Niyə axı PFL-i və AFFA-nı hədəfə almışam? “Sumqayıt”ın bu qurumlardan nəyi əskikdi?! Baxın, Anatoli Nuriyevi neçə gündü iştirak ərizəsinə salıblar, amma Ukraynadan Azərbaycana gətirə bilmirlər. Məsləhət görərdim ki, “Azov” batalyonuna, ya da Mariupol məscidindən girovların çıxarılması üçün ruslardan xüsusi əməliyyat keçirilməsini xahiş edən Ərdoğana üz tutsunlar. Nuriyevi futbolçu yox, din adamı kimi qurtarmaq olar. Cari mövsüm üçün hansısa hədəfi qalmayan, taleyi ilə barışan bir komandanın Nuriyevin arxasınca düşməsinin altında yatan niyyət nədi? Deyilənə görə, məşq etməsinə şərait yaratmaqla Millətlər Liqasının iyundakı oyunları ərəfəsində forma yığmasına çalışırlar. Adam aylardı futbol oynamır, qulağı artıq futbol marşına yox, artielleriya səsinə öyrəşib, Azərbaycan yığmasına hansı faydanı verəcək ki? – bu sualın da cavabı yoxdu.

“Sumqayıt”dan söz düşmüşkən, bu klubun prezidenti və AFFA Klublar Komitəsinin sədri Riad Rəfiyev deyir ki, ölkə çempionatında əvəzetmə sayının artırılması ilə bağlı İcraiyyə Komitəsinin müzakirəsinə çıxarmaq üçün təklif hazırlanır. 3 azdı, artıraq, 5 edək. Mirzə Ələkbər Sabir yaşasaydı, yəqin sabun bişirməz, çörəyi naminə “Şamaxı”nın oyunlarına bilet satardı. Hə, o məşhur Sabir ötən əsrin əvvəllərində yazırdı ki, “əcnəbi seyrə balonlarla çıxır, biz hələ avtomobil minməyiriz”. Klublar Komitəsinin hörmətli üzvləri, nəzərinizə çatdırım ki, əvəzetmə sayını artırmaq ideyası koronavirusun geniş yayıldığı dövrdə populyarlaşdı, düz iki il əvvəl – 2020-nin mayında ona görə belə qərar verildi ki, pandemiyanın futbola təsiri minimuma ensin, uzun fasilə verilən milli çempionatlar canlananda futbolçuların üzərinə hədsiz yük düşməsin. Bildiyim qədəri ilə bu dəyişiklik 2022-nin sonuna qədər qüvvədədi, yəni ilin sonunda məsələyə yenidən baxılması və dünya futbolunun əvvəlki limitə qayıtması tam realdı. İki il yatmışıq, dünya bu qaydanı ləğv etməyə hazırlaşanda deyirik ki, yox, biz indi 3-dən 5-ə keçmək istəyirik.

Bir mövzudan o birinə qaçaraq keçidlərə görə oxucu məni bağışlayar. Amma “Şamaxı”dan da yazmalıyam. Bəribaşdan deyim ki, böyük əksəriyyətdən fərqli mən “Keşlə”nin növbəti dəfə adını dəyişməsinə, qədim Şirvanşahlar dövlətinin paytaxtını təmsil etməsinə ironiya ilə yanaşmıram. Bu addım Azərbaycanın daha bir bölgəsində futbolun inkişafına səbəb olacaqsa, nə yaxşı! Sadəcə, sabah şamaxılılar da gəncəlilərin qaldırdıqları plakatlardan yazanda ara qarışacaq, məzhəb itəcək. Bizim futbolu idarə edənlər sadə bir məntiqi unudurlar ki, bu oyunda hər şey nəticə ilə ölçülür. Komandası uğur qazana bilməyən azarkeş sabah söyəcək də, döyəcək də, dağıdacaq da, yandıracaq da! Futbolunu əyri göstərən güzgünü qırmaq futbolun düzələcəyi anlamına gəlmir axı! Əsasnamənin hər bəndi reallıqdan, həyatdan götürülməlidi. Yox, hər yerdə gülün gülü, bülbülün bülbülü çağırmasını istəyirsizsə, futbolu ləğv edin, biz də bu yaşda özümüzə başqa iş-peşə tapaq.

HUŞƏNG