22-ci turda “Qəbələ”nin səfərdə “Səbail”ə uduzması şok effekti yaratdı.

Çoxları “qırmızı-qaralar”ın məğlubiyyətini gözləmirdi. 3-cü dövrənin əvvəlində ikinci pillədə qərarlaşan komanda sonda avrokuboklara qatılmaq şansını da əldən verə bilər. Ümumi fikir belədi ki, artıq “Qəbələ”nin gücü tükənib, komanda liderlər qrupunda qərarlaşmaq iqtidarında deyil. Görəsən, kollektivdə ab-hava necədi? Son 5 oyunda qələbə qazana bilməyən “qırmızı-qaralar” vəziyyəti dəyişə biləcəkmi? Bu suallara Ülvi İsgəndərovla söhbətdə cavab tapmağa çalışdıq. Axı o, Alimi ilə birgə “Qəbələ”nin cari mövsümdə ən sərrast futbolçusudu - rəqibləri 6 dəfə məyus edib. Özü də 24 yaşlı hücumçu bu qolların hamısını sonradan meydana çıxmaqla vurub.

- “Qəbələ” 5 turdu qələbə qazana bilmir. Bu uğursuzluq seriyasının səbəbi nədi?
- Mən buna uğursuzluq seriyası deməzdim. Hər komandada belə hallar olur. Bura qədər mübarizə aparıb, hazırkı mövqedə qərarlaşmışıq. Hər şey öz əlimizdədi. Mövsümü də yaxşı bitirmək istəyirik.

- Qış fasiləsinə ikinci pillədə yollanan “Qəbələ”, hazırkı durumu nəzərə alsaq, avrokuboklardan kənarda qala bilər. Komanda daxilində buna görə həyəcan təbili çalınır?
- Yenə deyirəm, komandada hər şey qaydasındadı. Çalışacağıq ki, vəziyyəti daha da yaxşılaşdıraq. Qarşıdakı oyunlarda qələbə qazanmaq istəyirik. Bundan sonra hər şey öz əlimizdədi.

- Ötən tur səfərdə “Səbail”ə 0:3 hesabı ilə uduzduz. Səbəb nə idi?
- Vallah, bunun səbəbini özümüz də bilmirik. Bizim üçün də ağır oyun oldu. “Səbail”lə görüş düşündüyümüz kimi olmadı. İstədiklərimizi həyata keçirə bilmədik. Nəticədə məğlub olduq.

- Bir çoxları deyir ki, “Qəbələ”də heyət çatışmazlığı var. Rəqiblər 13-14 futbolçunun hamısının potensialına bələddi. “Qəbələ”ni əsas rəqibləri üçün çözülmüş komanda saymaq olar?
- Düzdü, zədəlilərimiz və cəzalılarımız var. İstər-istəməz bu məqam çətinlik yaradır. Amma bu o demək deyil ki, biz çözülmüş komandayıq. Sadəcə, indi yaxşı nəticələr əldə edə bilmirik. Bunu da qarşıdakı oyunlarda həll etməyə çalışacağıq.

- 22 oyunda 6 qol vurmusan. Bunların hamısında sonradan meydana çıxmısan. Özünü “Qəbələ”nin əsas heyət üzvü kimi qəbul edirsən?
- Həmişə özümü əsas həyət üzvü hiss edirəm. Biz bir komandayıq. Oynasam da, oynamasam da, meydana bir məqsəd uğrunda çıxırıq: yaxşı oyun sərgiləmək, qələbə qazanmaq. Komanda olaraq hədəfimizə çatmaq üçün çalışırıq.

- Mövsümün yekunlaşmasına 6 tur qalıb. Bombardirlik yarışında qalib gələ bilərsənmi?
- Düzdü, özümü bombardirlər sırasında görürəm. Amma reallıq var. Gəlin, siyahıda ilk pillələrdə qərarlaşan futbolçulara baxaq. Hamısı 90 dəqiqə meydanda olan oyunçulardı. Mən əlimdən gələn qədər komandama kömək edirəm. Qollar vurmağa çalışıram. Bu mənim işimdi. Hər dəfə çalışıram ki, fərqlənərək azarkeşlərimizi sevindirim.

- Qış fasiləsində şayiələr yayıldı ki, Ülviyə Avropadan təkliflər var. “Qəbələ”dən ayrılmaq haqda düşünürsən?
- Bu haqda nəsə demək istəmirəm. Hazırda ancaq “Qəbələ” haqda düşünürəm. Komanda ilə birgə uğur qazanmaq niyyətindəyəm.

- Yığmanın son oyunlarına dəvət almamağın bir çoxlarının xoşuna gəlmədi. Özünü ölkənin əsas komandasında görürsən?
- O formanı geymək şərəfdi. Milli komandada oynamağa həmişə hazıram. Ən böyük hədəflərimdən biri yığmanın formasını geyməkdi. Bunun üçün hər şey etməyə hazıram. Ümid edirəm ki, bir gün arzum həyata keçəcək.

- Növbəti tur “Sumqayıt”ı qəbul edəcəksiz. Bu görüşdə qələbə həsrətinə son qoya biləcəksiz?
- “Sumqayıt”la oyun çətin olacaq. Əlimizdən gələnin 5 qatını edəcəyik ki, qələbə qazanaq. Son tərimizə qədər vuruşacağıq. Artıq azarkeşlərimizi sevindirmək vaxtıdı.

İLKİN SULTANLI