Region Liqasında 1/4 final mərhələsinin cütləri bəlli olub.

Diqqəti çəkən qarşılaşmalardan biri də "Xan Lənkəran"la "Füzuli" arasında baş tutacaq. Bu mərhələyə qədər inamla irəliləyən Füzuli təmsilçisi cənublularla görüşə də ciddi hazırlaşır. Planlarla bağlı klubun prezidenti Bəşir Əliyevlə danışdıq.

- Komanda 1/4 finala vəsiqə qazandı. Bu mövsüm üçün hədəf nədi?

- Əslində hədəfimiz gücümüzün çatacağı məqama qədər tükənməzdi. Hər halda, bizim klub daxil olmaqla, bütün komandalar "Qarabağ" kimi dünyada ölkəmizi təmsil etmək istəyər.

- Birinci diviziona çıxmaq hədəfi varmı? Bunun üçün AFFA-ya müraciət etmisiz?

- Birinci diviziona çıxmaq istəyimizdi. Hədəfimiz isə daha böyükdü. Açığı, klubumuz yarandığı ilk gündən heç bir rəsmi sponsoru olmadan özü-özünü ayaqüstə saxlamağı bacarıb. Bildiyiniz kimi, belə davam etmək çətindi. Region Liqasında çempion olmağı bacarsaq, AFFA-nın müəyyənləşdirdiyi qaydalara uyğun sponsor tapmağa çalışacağıq. Amma daha yaxşı olardı ki, 44 günlük Vətən müharibəsində həm ön, həm də arxa cəbhədə rəşadət göstərən, düşmən işğalından azad olan Füzuli rayonunun eyniadlı futbol komandasına AFFA hərtərəfli dəstək olsun.

- Kluba maliyyə dəstəyi verən şəxslər var. Bəs sponsor cəlb etmək barədə düşünürsüz?

- Komandamız ancaq Füzulinin dəyərli insanlarının maddi köməyi ilə oyunlara çıxır. Millət vəkilindən tutmuş sadə, zəhmətkeş insanlara qədər bu dəstəyi göstərir. Sponsor məsələsinə gəlincə, aşağı statuslu liqalarda reklam və marketinq maraqları az olduğu üçün iş adamları bura can atmır. Amma inanırıq ki, birinci diviziona çıxa bilsək, Füzulidən olan iş adamları bu işə maraq göstərib, sərmayə yatıracaqlar.

- Növbəti rəqib Region Liqasının favoriti "Xan Lənkəran"dı. Bu səddi adlaya biləcəksiz?

- "Xan Lənkəran" "Xəzər Lənkəran" deməkdi. Bu ad çox şeydən xəbər verir. Maddi baxımdan heç bir problemləri olmayan, oturuşmuş komandadı. Amma biz də sıfırdan yaratdığımız və heç bir sponsoru olmadan əzm və iradə nümayiş etdirməklə rəqiblərinə sürpriz edən döyüşkən Füzuli komadasıyıq. Sona qədər mübarizə aparmağa hazırıq.

- "Xan Lənkəran"la oyunun Horadizdəki stadionda keçirilməsi planlaşdırılır…

- Futbolda azarkeş “12-ci oyunçu” sayılır. Odu ki, doğma Horadizin stadionunda, minlərlə füzulili azarkeşin dəstəyi altında oynamaq istəyirik. Həmçinin bilet satışı təşkil etməklə futbolçular üçün stimullaşdırıcı qonorar verə biləcəyik. Məncə, Region Liqasının tarixində ən gözəl və möhtəşəm oyunlardan biri olacaq. Fürsətdən istifadə edərək füzulililəri oyuna baxmağa dəvət edirik. Qələbə bizimlə olacaq.

GÜNAY VƏLİYEVA