MHL-də son iki gündə keçirilən oyunlarla bağlı bəzi maraqlı məqamlar var.

Məsələn, “Los-Anceles”i 6:1 hesabıyla məğlub edən “Sietl” bu komanda üzərində tarixindəki ilk qələbəsini qazandı. “Sietl”in məhz cari mövsümdə MHL-də debüt etdiyini nəzərə alsaq, əslində burda hansısa qəribəlik yoxdu. Sadəcə, çempionatın debütantı əvvəlki iki oyunda “Los-Anceles”ə uduzmuşdu.

“Vaşinqton” da “Karolina”ya 1:6 hesabıyla uduzdu. Paytaxt klubunun hücumçusu Yevgeni Kuznetsovun 12 oyuna çatan xal qazanmaq seriyası qırıldı. Bu, rusiyalı hücumçunun şəxsi rekordudu. Klub tarixinin rekorduna gəlincə, Kuznetsov 12 və daha artıq oyunda xal toplayan 9-cu hokkeyçidi. Bu mənada mütləq rekord Mayk Qartnerə məxsusdu. O, 1981 və 1984-cü illərdə iki dəfə 17 oyunluq seriya yaxalayıb.

Qərb konfransında turnir cədvəlinə başçılıq edən “Kolorado”da üzlər gülmür ki, bunun da səbəbi var. Liderin hücumçusu Natan Makkinnon zədə ilə bağlı dərindən müayinə olunacaq. “Evelanş”ın baş məşqçisi Cared Bednar kanadalının zədəsini dava ilə bağlayıb. İlkin informasiyada forvardın hətta mövsümün qalan oyunlarını buraxacağı deyilir. Makkinnon “Minnesota” ilə oyunun 3-cü periodunda bu komandanın müdafiəçisi Mett Damba ilə dalaşıb və əlini zədələyib. Kanadalının cari mövsümdə keçirdiyi 51 oyunda 70 (22+48) xal topladığını da xatırladaq.

Buz üzərində yaşanlarla bağlı daha bir maraqlı xəbər: dünənin son oyununda “Dallas”a uduzan “Anahaym” ardıcıl 10-cu məğlubiyyətlə barışdı.
Bu arada MHL-də çıxış edən klubların baş menecerləri növbəti mövsümdən maaş tavanının 82,5 milyon dollara çatdırılacağıyla bağlı rəsmi bilgi alıb. Xatırladaq ki, son mövsümlərdə bu hədd 81,5 milyon olub. Ancaq MHL ilə Oyunçular Assosiasiyası arasında 2020-də razılaşdırıldığı kimi, yeni mövsümdən son hədd 1 milyon artırılacaq.