Dünən yoldaşlıq oyununda DÇ-2022-nin iki iştirakçısı - Danimarka ilə Serbiya üz-üzə gəldi. İnamlı təsir bağışlayan meydan sahibi danimarkalılar 3:0 hesabı ilə üstün oldular.

Bu oyunda ən çox maraq doğuran məqam Kristian Eriksenin yenidən ''Parken'' stadionunun meydanına ayaq basması oldu. Hətta məhz bu qayıdışın şahidi olmaq üçün tribunalara 38 min insan gəlmişdi. Son 17 ildə ilk dəfə Danimarkanın evdəki yoldaşlıq oyununda əsil anşlaq yaşandı. Bilindiyi kimi 9 ay, konkret desək 290 gün öncə Eriksen AÇ-2020-nin qrup mərhələsində Finlandiyaya qarşı ev oyununda huşunu itirərək yerə yıxılmışdı.

Həkimlər onu həyata qaytarmaq üçün əvvəlcə stadionda, sonra da xəstəxanada əllərindən gələni etdilər. Eriksen həmin ölüm-qalım mübarizəsindən qalib kimi ayrıla bildi. Beləcə 30 yaşlı yarımmüdafiəçi 9 ay öncə xərəkdə tərk etdiyi stadiona qolla qayıtdı. O, matçın 57-ci dəqiqəsində fərqlənməklə yekun nəticəni müəyyənləşdirdi. Qapıçı Kasper Şmeyhel həm də bu oyunda xüsusi olaraq kapitan sarğısını Eriksenə vermişdi. Onu da bildirək ki, təcrübəli futbolçu qayıdışından sonra yığmada ardıcıl 2-ci oyunda fərqlənməyi bacardı. O, martın 26-da Danimarkanın səfərdə Niderlanda 2:4 hesabı ilə uduzduğu görüşdə də qol vurmuşdu.