AÇ-2028-i və və AÇ-2032-ni hansı ölkələr təşkil etmək istəyirlər?
AÇ-2028 və AÇ-2032-nin təşkilatçılığı üzrə müsabiqənin vaxtı bitib.
Sifariş ərizələrinin təqdimatı üçün müəyyən edilən tarix martın 23-də sona çatıb.
Hələ bir müddət əvvəl Böyük Britaniya (İngiltərə, Şotlandiya, Uels, Şimali İrlandiya) və İrlandiyanın AÇ-2028 üçün UEFA-ya şərikli təşkilatçılıqla bağlı müraciət etdiyi məlum olmuşdu. İki dövlətin çərşənbə günü yaydığı ümumi bəyanatda belə deyilir:
“Biz unikal tərəfdaşlığımız sayəsində sonrakı müvafiq addımları atacağıq. Məqsədimiz AÇ-2028-i azarkeşlər və komandalar üçün əsl futbol bayramına çevirmək, turniri ən yüksək səviyyədə təşkil etməkdi. AÇ-2028-in Böyük Britaniya və İrlandiyada keçirilən unudulmaz idman hadisələrindən biri olacağını hesab edirik”.
6 ildən sonrakı qitə çempionatını Türkiyə də təşkil etmək istəyir. Türkiyə Futbol Federasiyasının məlumatında yarışa evsahibliyi etmək üçün rəsmi şəkildə UEFA-ya müraciət edildiyi bildirib. Rusiya isə həm AÇ-2028, həm də AÇ-2032-nin təşkilatçılığı üçün UEFA-ya müraciət edib. Əlbəttə, Ukrayna ilə müharibə edən, bütün komandaları beynəlxalq yarışlardan kənarlaşdırılan ölkənin belə vəziyyətdə nəhəng turnirə evsahibliyi iddiası ilə çıxış etməsi çoxlarında təəccüb doğurub. Rusiya Futbol İttifaqının (RFİ) prezidenti Aleksandr Dyukov təşkilatçılıq üçün müvafiq sənədlərin UEFA-ya göndərildiyini bildirib:
“RFİ-nin İcraiyyə Komitəsi müvafiq bəyannamə ilə çıxış etmək qərarına gəlib. Bizim 2023-cü il aprelin 12-nə qədər vaxtımız olacaq. Rusiya bu bəyannamə ilə çıxış etməklə böyük turnirlərin təşkilatçılığına hazır olduğunu göstərir. Ölkəmizin belə yarışları ən yüksək səviyyədə keçirməklə bağlı təcrübəsi var”.
UEFA iki qitə çempionatına iddia edən ölkələrin siyahısını rəsmən aprelin 5-də açıqlayacaq. Müsabiqənin qaliblərinin adlarının isə 2023-cü ilin sentyabrında açıqlanması planlaşdırılıb. Yeri gəlmişkən, “The Telegraph” qəzeti UEFA-nın Rusiyanın AÇ-2028 və ya AÇ-2032-yə evsahibliyi etməklə bağlı sifarişinə rədd cavabı verməyə hazırlaşdığını xəbər verib. İngiltərə nəşri qurum rəhbərliyinin hazırda bununla bağlı müzakirələr apardığını iddia edir. Bu mənbəyə inansaq, UEFA-da hesab edirlər ki, hazırkı mərhələdə Rusiyada beynəlxalq turnirin keçirilməsi ilə bağlı qərar vermək mənasızdı. Təşkilatın mətbuat xidmətinin “The Telegraph”ın iddiasına reaksiyası belə olub:
“FİFA və UEFA fevralın 28-də Rusiyanın bütün komandalarının beynəlxalq yarışlardan kənarlaşdırıldığını bəyan edib. Lakin Rusiya Futbol İttifaqının bu təşkilatlardakı fəaliyyətinə hər hansı qadağa qoyulmayıb. UEFA-nın İcraiyyə Komitəsi müntəzəm əsasda növbəti növbədənkənar iclasları gözləmə mövqeyində olacaq. Hüquqi və faktiki vəziyyətin dəyərləndirilməsi üçün nəzərdə tutulan növbəti iclaslar aprelin 7-nə və mayın 10-na təyin olunub. Zərurət yaranarsa, əlavə toplantılar da keçirilə bilər. Bu addımın eyni zamanda RFİ-nin UEFA-ya iki turnirlə bağlı rəsmi müraciətinin dəyərləndirilməsi üçün atılması mümkündü”.
Digər xəbərlər
