Moskva “Spartak”ının yetirməsi Azərbaycandan təklif gözləyir - AÇIQLAMA
Son illər ölkə xaricində yaşayan qürbətşi-futbolçularımıza maraq artıb.
Bu gün yaşı 17-25 aralığında olan yetərincə həmvətənimiz Rusiya və Avropada çıxış edirlər ki, vaxtaşırı onların varlığından xəbər tuturuq. Belə gənclərdən biri də hazırda Rusiya ikinci liqasında çıxış edən Moskvaətrafı qəsəbəni, daha dəqiq desək, Domodedovonu təmsil edən “Persvet”in şərəfini qoruyan Roman Cəfərovdu. Moskva “Spatak”ının yetirməsi olan yarımmüdafiəçinin indiki klubu ilə iyuna qədər müqaviləsi var. Ona hazırda Rusiyanın birinci divizionunda çıxış edən klublardan təklif olsa da, Roma qərar verməkdə tələsmək istəmir. 20 yaşlı futbolçunun atası, ağır atletika üzrə SSRİ çempionu, beynəlxalq dərəcəli idman ustası Rauf Cəfərovun sözlərinə görə, oğlu Azərbaycan klublarından təklif gözləyir.
Cəfərov “Football-plus.az” saytına oğlu ilə bağlı bunları söylədi:
“Roma futbolun sirrlərini “Spartak”ın akademiyasında öyrənib. Yarımmüdafiəmin həm sağında, həm də solunda oynaya bilir. Rusiyalı mütəxəssislər onun barəsində yüksək fikirdədilər. Çox sürətli və ağıllı oyunçudu. Rusiya futbolunun tanınmış veteranı Andrey Kançelskis onun oyunu çox bəyənir və özü də futbol oynadığı dönəmdə həmin mövqedə çıxış etdiyindən vinger üçün lazım olan bütün keyfiyyətlərin Romada olduğunu bildirib”.
Böyük Cəfərov övladının 3 il əvvəl yığmaya dəvət aldığını, lakin müəyyən səbəblərdən “izdivac”ın baş tutmadığını vurğuladı:
“Təxminən 2-3 il əvvəl onu U-19-a dəvət etmişdilər. Həmin vaxt “Spartak”ın müvafiq yaş qrupunun heyətində Roma Rusiya çempionu olmuşdu. Artıq vaxtaşırı əsas komandanın məşqlərinə də qoşulurdu. Toplanışların birində Bakıya gəldi və məşqlərdə iştirak etdi. Amma sonradan klubunun oyun təqvimi ilə yığmanın toplanışları üst-üstə düşdüyündən millinin düşərgəsinə qatıla bilmədi. Ancaq indi yığmadan dəvət gələrsə, məmuniyyətlə dəyərləndirər. AFFA-nın seleksiyaçı-məşqçiləri, xaricdə çıxış edən azərbaycanlı futbolçuları nəzarətdə saxlayan şəxslər onu yaxşı tanıyırlar”.
Rauf bəy oğlunun Azərbaycan premyer-liqasında oynamaq istədiyini də etiraf etdi:
“Açığı, özümüz də istəyirik ki, o Azərbaycan klublarından birinə keçsin. Ancaq hələ ki, təklif yoxdu. “Persvet”lə müqaviləsi bu yay başa çatır. Rusiya birinci dəstəsində mübarizə aparan bir neçə klub onun xidmətində maraqlıdı. Ən real təklif isə “Nijni Novqorod”dan gəlib. Romanın da fikiri vətəndə çıxış etməkdi. İndi maraqlanan olsa, danışılar masasına otura bilərik. “Nijni Novqorod”la müqavilə bağlayandan sonra çətin ki, onu Bakıya dönüşü alınsın. Özüm də idmançı olmuşam, SSRİ-nin əməkdar idman ustasıyam. İstərdim övladım həm tarixi vəytnininyığmasında, həm də premyer-liqa klublarımızın birində oynasın”.
RƏŞAD
Digər xəbərlər
