"Valideynlər qız uşaqlarının futbola yolunun qarşısında durur” - Millinin baş məşqçisi
17 yaşadək qızlardan ibarət yığma Avropa çempionatının ikinci təsnifat mərhələsində çıxışını başa vurdu.
Yığma keçirdiyi hər üç matçda məğlub oldu. İlk görüşdə meydan sahibi Albaniyaya 0:1 uduzan xanımlar Şimali Makedoniya (0:3) və Şotlandiya (0:6) ilə də bacarmadı.
Qrupu xalsız və qolsuz son pillədə başa vuran U-17-nin uğursuz çıxışı barədə baş məşqçi Zamir Həsənov ilə danışdıq: "İlk görüşümüz ev sahibi Albaniyaya qarşı oldu. Təəssüf ki, bu oyuna ciddi itkilərlə çıxmışdıq. Üç əsas futbolçumuz ilk mərhələdə cəzalı duruma düşmüşdü, iki nəfər isə toplanışdan öncə yerli liqa oyunlarında zədələnmişdi. Bu qədər itki bizim kimi qadın futbolunda yeni olan komanda üçün ciddi problemdi. Bu üzdən heyətdə ciddi sıxıntı yaranmışdı. İkinci görüşdə cəzalı oyunçularımız heyətə qayıtsa da, zədəlilərə yeniləri qoşuldu. Bu üzdən əlimizdə yetərincə keyfiyyətli futbolçu olmadığına görə onlarin boşluğunu aradan qaldırmaq bir məşqçi kimi mənə çox çətin idi. Şotlandiya millisi ilə qarşılaşmaya gəlincə, bu komandaya ilk mərhələdə COVID-lə bağlı iştirak etmədiyinə görə texniki məğlubiyyət verilmiş və B liqasına göndərilmişdi. Şotlandiya kimi qadın futbolunda yüksək performans göstərən komandalara qarşı oynamaq bütün iştirakçılar üçün yaxşı təcrübə oldu. Zəif nəticələrin bəlli səbəbi var. Bu, Azərbaycanda qadın futbolunda kütləviliyin aşağı olmasıdı. Mental dəyərlər var. Valideynlər qız uşaqlarının futbola yolunun qarşısında durur. Həmçinin son illər məlum pandemiya dövründə qızların futbola cəlb olunmasında ciddi problem yaşandı. AFFA yetərincə turnir və festivallar keçirir ki, bu problemi aradan qaldırsın. Amma yenə də kütləvilik yetərli deyil. Ümid edirəm ki, tezliklə bu problemləri aradan qaldıracağıq".
GÜNAY VƏLİYEVA
Digər xəbərlər
